07.09.2026 | 14:59
Պեսկովը հայտնել է Փաշինյան-Պուտին հանդիպման օրակարգը
ԱՄՆ-ն Ուկրաինային անվտանգության երաշխիքներ է առաջարկում ՆԱՏՕ-ի 5-րդ հոդվածի մոդելով․ Axios
Քաղաքականություն
21.11.2025 | 17:22
ԱՄՆ նախագահի հատուկ բանագնաց Սթիվ Ուիթկոֆի կողմից մշակված՝ Ուկրաինայում պատերազմը դադարեցնելու ծրագրում նշվում է Կիևի անվտանգության երաշխիքների մասին: Սա Ուկրաինայի հիմնական պահանջներից է, և ԱՄՆ-ն առաջին անգամ է արտահայտում իր պատրաստակամությունը նման երաշխիքներ տրամադրելու հարցում։ Սակայն պլանում դրանք կոնկրետացված չեն, պարզապես նշվում է, որ եթե Մոսկվան կրկին ներխուժի Ուկրաինա, «ուժեղ, համակարգված ռազմական պատասխանից» բացի՝ նրա դեմ բոլոր պատժամիջոցները կվերականգնվեն, գրում է BBC-ի ռուսական ծառայությունը։
Սակայն, ըստ Axios-ի, ԱՄՆ-ն անվտանգության երաշխիքների տակ հասկանում է ՆԱՏՕ-ի կանոնադրության 5-րդ հոդվածի վրա հիմնված պարտավորություններ: Այս հոդվածը սովորաբար նշվում է որպես դաշինքի անդամների պարտավորություն՝ մի երկրի վրա հարձակումը համարել բոլորի վրա հարձակում։
Այս մասին ասվում է մեկ այլ նախագծային փաստաթղթում, որը հրապարակվել է Axios-ի կողմից, և որն առաջարկվում է ստորագրել ոչ միայն Մոսկվայի, Կիևի և Վաշինգտոնի, այլև ՆԱՏՕ-ի ու ԵՄ-ի կողմից։
Փաստաթղթում նաև նշվում է, որ եթե Ռուսաստանը կրկին հարձակվի Ուկրաինայի վրա, ԱՄՆ նախագահը, ՆԱՏՕ-ի և ԵՄ-ի հետ խորհրդակցություններից հետո, «կորոշի անվտանգությունը վերականգնելու համար անհրաժեշտ միջոցառումները»։ Փաստաթղթում նշվում է, որ դրանք կարող են ներառել ռազմական ուժ, հետախուզական և լոգիստիկ աջակցություն, տնտեսական և դիվանագիտական գործողություններ և այլ քայլեր։
Ստորագրվելուց հետո անվտանգության մասին համաձայնագիրն ուժի մեջ կմնա 10 տարի՝ երկարաձգման հնարավորությամբ։
Հիշեցնենք, որ ավելի վաղ Ուկրաինայի Գերագույն ռադայի պատգամավոր Ալեքսեյ Գոնչարենկոն հրապարակել էր ԱՄՆ մշակած ծրագրի բոլոր 28 կետերը։
Թարգմանությունը՝ Էմմա Չոբանյանի
