30.06.2026 | 03:40
ԱԱ-2026. Գերմանիան դուրս մնաց պայքարից. ՏԵՍԱՆՅՈՒԹ
Թուրքիան հաջորդ տարի կհյուրընկալի COP31 կլիմայական գագաթնաժողովը
Քաղաքականություն
20.11.2025 | 14:00
Թուրքիան պատրաստվում է հաջորդ տարի Անթալիայի միջերկրածովյան հանգստավայրում անցկացնել COP31 կլիմայական գագաթնաժողովը՝ այն բանից հետո, երբ Ավստրալիայի վարչապետ Էնթոնի Ալբանեզը հայտարարել է, որ Կանբերան հրաժարվում է այն հյուրընկալել, գրում է Turkiye today-ը։
«Համաձայնեցված է, որ Ավստրալիայից [կլիմայի փոփոխության նախարար] Քրիս Բոուենը կլինի COP-ի բանակցությունների նախագահը։ Համաժողովը և COP-ի նախագահությունը կանցկացվեն Թուրքիայում, ինչպես նաև կլինի COP-ից առաջ հանդիպում, որը կկենտրոնանա, մասնավորապես, Խաղաղ օվկիանոսում կլիմայի փոփոխության ֆինանսավորման և Խաղաղ օվկիանոսի դիմադրողականության հիմնադրամի վրա՝ հաջորդ տարի Խաղաղ օվկիանոսում կայանալիք COP-ի նախապատրաստման շրջանակում»,- ասել է Ալբանեզեն ավստրալական հանրային ABC Radio Perth-ին։
Նա համաձայնագիրը որակել է որպես «մեծ հաղթանակ և՛ Ավստրալիայի, և՛ Թուրքիայի համար»։
«Կլիմայի վերաբերյալ համաժողովների կանոնները պետք է իրականացվեն կոնսենսուսի միջոցով։ Եթե կոնսենսուս չլիներ, ապա այն կգնար Գերմանիայի Բոնն քաղաք»,- ասել է նա։
Խաղաղօվկիանոսյան կղզիների բնակիչները դատապարտել են իրենց կլիմայական խնդիրներին ուշադրություն հրավիրելու հնարավորությունից զրկելը՝ այն բանից հետո, երբ մերժվել է հաջորդ տարվա COP կլիմայական գագաթնաժողովը համատեղ անցկացնելու իրենց հայտը, հաղորդում է Agence France-Presse (AFP):
«Մենք դժգոհ ենք: Եվ հիասթափված ենք, որ այսպես ավարտվեց»,- AFP-ին ասել է Պապուա Նոր Գվինեայի արտաքին գործերի նախարար Ջասթին Տկաչենկոն, երբ Ավստրալիան հայտարարել է, որ նահանջելու է:
Ավստրալիան COP31-ը Խաղաղօվկիանոսյան կղզի-պետությունների հետ միասին անցկացնելու արշավ է ծավալել։ Հայտը պաշտպանում է 18 անդամից բաղկացած Խաղաղօվկիանոսյան կղզիների ֆորումը։ Այնուամենայնիվ, Ավստրալիայի կառավարությունում տարաձայնություններ կային այն հարցի շուրջ՝ արդյո՞ք արժե շարունակել հայտի ընդունումը, քանի որ, գնահատականների համաձայն, կլիմայական համաժողովի հյուրընկալումը կարող է արժենալ մինչև 1,3 միլիարդ դոլար։
Թուրքիայի փոխնախագահ Ջևդեթ Յըլմազը, ելույթ ունենալով COP30-ի առաջնորդների գագաթնաժողովում, նշել է, որ Անկարան պատրաստ է կամուրջ ծառայել համաշխարհային հյուսիսի և հարավի միջև։
«Մենք չենք ցանկանում, որ բանակցությունները գերիշխեն եսասիրության և կարեկցանքի պակասի վրա։ Թուրքիան հասկանում է ինչպես զարգացած, այնպես էլ զարգացող երկրների հեռանկարները։ Մենք ինտենսիվ բանակցություններ ենք վարում COP31-ը հյուրընկալելու վերաբերյալ և լիովին հանձնառու ենք այն դարձնել այնպիսի գագաթնաժողով, որտեղ լսելի կլինեն բոլոր ձայները»,- ասել է Յըլմազը։
Թարգմանությունը՝ Էմմա Չոբանյանի
