«Տրանսնեֆտ»-ը դադարեցրել է նավթի մղումը Նովոռոսիյսկ՝ ԱԹՍ-ների հարվածներից հետո․ քաղաքում արտակարգ դրություն է հայտարարվել

Ռուսական Նովոռոսիյսկի նավահանգստի նավթի բեռնման տերմինալները նոյեմբերի 14-ի գիշերը ենթարկվել են անօդաչու թռչող սարքերի հարձակման: Իշխանությունները քաղաքում արտակարգ դրություն են հայտարարել: Reuters-ի փոխանցմամբ՝ «Տրանսնեֆտը» դադարեցրել է նավահանգիստ նավթի մղումը, գրում է The Insider-ը։

Նոյեմբերի 14-ի առավոտյան Կրասնոդարի երկրամասի օպերատիվ շտաբը հայտնել էր Շեսխարիսի բեռնափոխադրման համալիրի նավթաբազայի վնասման և անօդաչու թռչող սարքերի բեկորների  ընկնելու մասին: Բեկորները նաև վնասել են նավահանգստում գտնվող քաղաքացիական նավերից մեկը: Վիրավորվել են անձնակազմի երեք անդամներ։

Ավելի ուշ տեղական իշխանությունները քաղաքում արտակարգ դրություն են հայտարարել: Քաղաքապետ Անդրեյ Կրավչենկոն գրել է, որ մեկ մարդ վիրավորվել է։ Տելեգրամ  ալիքները նույնպես հրապարակում են հարվածների կադրեր, որոնք նկարահանվել են ականատեսների կողմից: Տեսանյութերից մեկն արձանագրել է, ենթադրաբար, 1537-րդ զենիթահրթիռային գնդի C-300/S-400 համալիրի զենիթահրթիռային հրթիռներին հարվածը։

Հրդեհների հետևման NASA Firms ծառայության տվյալներով՝ հրդեհ է բռնկվել նաև C-300/C-400 հրթիռային համակարգերի վրա հարձակման ենթադրյալ վայրում։ Արբանյակները գրանցել են երեք խոշոր հրդեհ քաղաքի նավահանգստի տարածքում, որտեղ նավթային տերմինալներ կան։

Reuters-ը, երկու աղբյուրների վկայակոչելով, հայտնում է, որ քաղաքի վրա գիշերային հարձակումից հետո «Տրանսնեֆտ»-ը դադարեցրել է Նովոռոսիյսկի նավահանգիստ նավթի մղումը։  Ընկերությունը, սակայն, հրաժարվել է մեկնաբանություն տալ։

Թարգմանությունը՝ Էմմա Չոբանյանի