Ուկրաինական ԱԹՍ-ները հարձակվել են Նովոռոսիյսկի վրա․ վնասվել են նավթաբազան, քաղաքացիական նավ  և բնակելի շենքեր․ ՏԵՍԱՆՅՈՒԹ

Ուկրաինական անօդաչու թռչող սարքի հարձակման հետևանքով Նովոռոսիյսկում վնասվել է«Շեսխարիսի» վերբեռնման համալիրի նավթաբազան։ Այս մասին հայտնել է Կրասնոդարի երկրամասի օպերատիվ շտաբը, գրում է Meduza-ն։

Ափամերձ կառույցները նույնպես վնասվել են։ Օպերատիվ շտաբից հայտնել են, որ անօդաչուի բեկորների ընկնելուց հետո նավթի պահեստում հրդեհ է բռնկվել, որն արդեն մարվել է։ Նովոռոսիյսկի նավահանգստում քաղաքացիական նավի վրա անօդաչու թռչող սարքի բեկորների ընկնելու պատճառով վնաս է հասցվել։ Անձնակազմի երեք անդամ վիրավորվել և հոսպիտալացվել է։

Բացի այդ, Նովոռոսիյսկի մի քանի հասցեներում բնակելի շենքեր են վնասվել անօդաչու թռչող սարքերի հարվածներից: Մի տղամարդ վիրավորվել է և հոսպիտալացվել:

Ռուսաստանի պաշտպանության նախարարությունը հայտնել է, որ ՀՕՊ ուժերը գիշերը խոցել են 216 ուկրաինական անօդաչու թռչող սարք, որոնց մեծ մասը ոչնչացվել է Կրասնոդարի երկրամասում (66), Սարատովի մարզում (45) և բռնակցված Ղրիմում (19):

Սարատովի մարզի նահանգապետ Ռոման Բուսարգինը հայտարարել է, որ հարվածը վնաս է հասցրել Սարատովի քաղաքացիական ենթակառուցվածքներին: Նա այլ մանրամասներ չի հայտնել: Astra տելեգրամ ալիք հաղորդում է, որ հարված է հասցվել նավթավերամշակման գործարանին:

«Շեսխարիս»համալիրը (շահագործվում է «Տրանսնեֆտ»-ի կողմից) Ռուսաստանի հարավում գտնվող նավթի և նավթամթերքի խոշորագույն տերմինալներից մեկն է։ Այն օգտագործվում է արտահանման համար նախատեսված նավթի և նավթամթերքի ստացման, պահեստավորման և առաքման, ինչպես նաև Կրասնոդարի երկրամասի նավթավերամշակման գործարաններ մատակարարումների համար։

Թարգմանությունը՝ Էմմա Չոբանյանի