Ալիևը հայտարարել է, թե «Զանգեզուրի միջանցքի» բացումը օգուտ կբերի Կենտրոնական Ասիայի բոլոր երկրներին

Ադրբեջանի նախագահ Իլհամ Ալիևը շարունակում է, այսպես կոչված,«Զանգեզուրի միջանցք» եզրույթն օգտագործել, այս անգամ՝ Տաշքենդում Կենտրոնական Ասիայի պետությունների ղեկավարների յոթերորդ խորհրդատվական հանդիպումից առաջ Ուզբեկստանի ազգային լրատվական գործակալությանը տված հարցազրույցում։

«Ադրբեջանում ստեղծված ժամանակակից տրանսպորտային ենթակառուցվածքները, այդ թվում՝ առևտրային նավատորմը, Ալյաթ միջազգային առևտրային նավահանգիստը, որի հզորությունն առաջիկա տարիներին կհասնի 25 միլիոն տոննայի, Բաքու-Թբիլիսի-Կարս երկաթուղին և երկրի ինը միջազգային օդանավակայանները, բոլորն էլ նպաստում են Ադրբեջանի դերի ամրապնդմանը՝ որպես համաշխարհային տրանսպորտային և լոգիստիկ կենտրոնի: Բացի այդ, Զանգեզուրի միջանցքի բացումն օգուտ կբերի Կենտրոնական Ասիայի բոլոր երկրներին»,- հայտարարել է Ալիևը։

Նրա խոսքով՝ երկու երկրների միջև համագործակցության հիմնական ոլորտներից մեկը բազմազան տրանսպորտային և լոգիստիկ ենթակառուցվածքների զարգացումն ու տարանցիկ հնարավորությունների ընդլայնումն է։

«Այս ոլորտում մեր երկրների մասնակցությունը Միջին միջանցքի միջազգային տրանսպորտային երթուղուն առանձնահատուկ նշանակություն ունի, քանի որ Ադրբեջանը կարևոր տարանցիկ երկիր է Ուզբեկստանի և Կենտրոնական Ասիայի երկրների համար։ Վերջին տարիներին Միջին միջանցքով արտահանման հնարավորությունների և բեռնափոխադրումների աճը ձեռք է բերել առանձնահատուկ ռազմավարական նշանակություն»,- ասել է նա։

Հավելենք, որ Վաշինգտոնում օգոստոսի 8-ին ստորագրված համաձայնագրերով որևէ «Զանգեզուրի միջանցքի» մասին խոսք չկա։ Դրանցում նշվում է «Թրամփի երթուղու» (TRIPP) մասին, սակայն Բաքվի քարոզչամեքենան ու ադրբեջանցի պաշտոնյաները, այդ թվում՝ նախագահ Իլհամ Ալիևը շարունակում են «միջանցք» եզրույթն օգտագործել՝ խեղաթյուրելով ստորագրված փաստաթղթերի բովանդակությունը։

Թարգմանությունը՝ Էմմա Չոբանյանի