28.04.2026 | 16:06
Մեկ շաբաթից կտեսնենք նաև Ֆրանսիայի հետ երկար բանակցված փաստաթղթի ստորագրումը
2022 թվականից կլինիկայում գտնվող Սաակաշվիլիին բանտ են տեղափոխել
Քաղաքականություն
13.11.2025 | 11:42
Վրաստանի երրորդ նախագահ Միխեիլ Սաակաշվիլին վերադարձվել է №12 ուղղիչ հիմնարկ, որտեղ կշարունակի կրել իր պատիժը՝ «համաձայն ընդհանուր ընթացակարգի»։ Այս մասին ասվում է Վրաստանի քրեակատարողական ծառայության հայտարարության մեջ։
Ըստ գերատեսչության՝ Սաակաշվիլին 2022 թվականի մայիսի 12-ին տեղափոխվել է «Վիվամեդ» կլինիկա՝ ստացիոնար բժշկական օգնության համար, և այդ ժամանակից գտնվել է բժշկական հսկողության տակ։
«Վրաստանի օրենսդրության համաձայն՝ քաղաքացիական հիվանդանոցից ուղղիչ հաստատություն հիվանդի վերադարձը որոշում է բուժող բժիշկը՝ հաշվի առնելով նրա առողջական վիճակը։ Քանի որ բանտարկյալ Միխեիլ Սաակաշվիլիի առողջական վիճակը բավարար է, նա այլևս ստացիոնար բուժման կարիք չունի, դուրս է գրվել քաղաքացիական հիվանդանոցից և վերադարձվել թիվ 12 ուղղիչ հաստատություն, որտեղ կշարունակի կրել իր պատիժը ընդհանուր հիմունքներով»,- ասվում է հայտարարության մեջ։
Սաակաշվիլին, ըստ ավելի վաղ կայացված դատավճիռների, պետք է անազատության մեջ անցկացնի մինչև 2034 թվականի ապրիլի 1-ը։
Միաժամանակ, նոյեմբերի 6-ին Վրաստանի դատախազությունը հայտարարել էր ութ հայտնի ընդդիմադիր քաղաքական գործիչների, այդ թվում՝ բանտարկված նախկին նախագահ Միխեիլ Սաակաշվիլիի դեմ քրեական գործ հարուցելու մասին: Քննության վարկածով՝ Սաակաշվիլին, օգտագործելով իր սոցիալական ցանցերի էջերը և տեսաուղերձները, հրապարակայնորեն իր կողմնակիցներին «պայքարի և ագրեսիվ դիմադրության», ինչպես նաև կառավարական շենքերը գրավելու և «ռեժիմը տապալելու» կոչ է արել:
Թարգմանությունը՝ Էմմա Չոբանյանի
