Քաղաքականություն
04.11.2025 | 15:55
«Երևանի ղազիյաթի գործունեությունը սերտորեն կապված է Արևմտյան Ադրբեջան վերադառնալու հայեցակարգի հետ։ Մենք աշխատում ենք այս ուղղությամբ»,- ադրբեջանական պետական Ազերթաջ գործակալությանը տված հարցազրույցում այս մասին հայտարարել է, այսպես կոչված, «Երևանի ղազի» Բախտիյար Նաջաֆովը։
«Երևանի ղազիյաթի մեր հիմնական աշխատանքային ծրագիրը հիմնված է Արևմտյան Ադրբեջանի համայնքի հետ համագործակցության վրա, և մենք մեր գործունեությունն իրականացնում ենք նրանց օրենսդրությանը համապատասխան։ Ներկայումս մեր գլխավոր նպատակն է ամրապնդել կապերը Ադրբեջանում բնակվող արևմտյան ադրբեջանցիների հետ։ Ապագայում քայլեր կձեռնարկվեն՝ կապված Արևմտյան Ադրբեջանում կրոնական պաշտամունքային կենտրոնների և հաստատությունների գործունեության հետ: Մենք կարծում ենք, որ նախագահի գաղափարախոսությունը Արևմտյան Ադրբեջանի վերաբերյալ կիրականացվի, և այս առումով մենք կշարունակենք մեր գործունեությունը կառուցել կրոնական հիմքի վրա: Ներկայում Երևանի ղազիյաթը վերսկսել է իր գործունեությունը Կովկասի մուսուլմանների վարչության ներքո և հաջողությամբ իրականացնում է իր աշխատանքը»,- հայտարարել է նա։
Հիշեցնենք, որ վերջերս Կովկասի մահմեդականների վարչությունը նիստ էր հրավիրել ու Երևանում մահմեդական համայնքի հետ կապված «մասնաճյուղ»՝ ղազիյաթ (համարժեք են քրիտոնեական թեմերին) ստեղծել, ինչպես նաև ղեկավար նշանակել։
Միաժամանակ, Բաքուն, այսպես կոչված, «Արևմտյան Ադրբեջանի» թեզն է առաջ մղում, որով փաթեթավորում է իր անհիմն ու կեղծ տարածքային պահանջները ՀՀ-ի նկատմամբ։ «Արևմտյան Ադրբեջան» ասելով՝ Ադրբեջանում ներկայացնում են ՀՀ տարածքը։
OC Media-ն էլ ավելի վաղ հայտնել էր, որ իր ուսումնասիրած արտահոսած փաստաթղթերը բացահայտում են, թե ինչպես է Ադրբեջանի նախագահի աշխատակազմը համակարգել և ֆինանսավորել «Արևմտյան Ադրբեջան» նարատիվի միջազգային տարածումը։
Թարգմանությունը՝ Էմմա Չոբանյանի
