Ադրբեջանում լրագրող է ձերբակալվել հեղաշրջման կազմակերպման գործով

Ադրբեջանի Պետական ​​անվտանգության ծառայությունը (ՊԱԾ) գործողություն է իրականացրել Hurriyet TV-ի խմբագրությունում։ Hürriyyət թերթի, համանուն hurriyyet.az կայքի և Hurriyyet TV հեռուստաալիքի գլխավոր խմբագիր Վուգար Մամեդովը ձերբակալվել է, հայտնում են տեղական լրատվամիջոցները։

Վուգար Մամեդովն Ադրբեջանի Դեմոկրատական ​​կուսակցության նախագահ Սարդար Ջալալօղլուի եղբորորդին է։

Ըստ իշխանամետ կայքերի՝ խմբագրության խուզարկության ժամանակ առգրավվել է համակարգիչ և որոշ փաստաթղթեր։

Նշվում է, որ գործողությունը կապված է Ադրբեջանի նախագահի աշխատակազմի նախկին ղեկավար Ռամիզ Մեհդիևի հետ, որը ներկայում տնային կալանքի տակ է։

Հավելենք, որ Բաքվի Սաբայիլի շրջանային դատարանն օրերս որոշում էր կայացրել Մեհդիևի դեմ հարուցված քրեական գործի վերաբերյալ։ Դատարանը, բավարարելով Ռամիզ Մեհդիևի նկատմամբ առանձնապես ծանր քրեական հանցագործությունների համար քրեական հետապնդում իրականացնելու միջնորդությունը, նրա նկատմամբ որպես խափանման միջոց էր ընտրել 4 ամիս ժամկետով տնային կալանքը։

Նրան  մեղադրանք է առաջադրվել Ադրբեջանի քրեական օրենսգրքի 278.1 (պետական ​​իշխանությունը զավթելուն ուղղված գործողություններ), 274 (պետական ​​դավաճանություն) և 193-1.3.2 (հանցավոր ճանապարհով ձեռք բերված գույքի օրինականացում) հոդվածներով։ Ադրբեջանական ԶԼՄ-ները հայտնել էին, թե Ռամիզ Մեհդիևը ծրագրել է երկրի  նախագահ Իլհամ Ալիևի սպանությունը։ Ադրբեջանի նախագահական օդանավի փոխարեն, սակայն, խոցվել է AZAL-ի ինքնաթիռը։ Դրանից առաջ էլ հաղորդվել էր, թե Մեհդիևը փորձել է ՌԴ-ի աջակցությամբ հեղաշրջում պատրաստել։

Թարգմանությունը՝ Էմմա Չոբանյանի