Բարձր տեխնոլոգիաներ՝ ցածր բյուջեով․ ինչու է կառավարությունը կրճատում գերակա ոլորտի ֆինանսավորումը. ՏԵՍԱՆՅՈՒԹ

10 մլրդ դրամով կրճատվում է Բարձր տեխնոլոգիական արդյունաբերության նախարարության բյուջեն․ Ֆինանսների նախարարը խոստովանում է՝ վերջին տարիներին կառավարության ծախսերը մեծ աճ են արձանագրել և կարիք է առաջացել աճի տեպը դանդաղեցնել։ 

2021-ից մինչև 2025 թվականը նախարարության բյուջեն աճել է ավելի քան հինգ անգամ՝ 9 մլրդ դրամից հասնելով 47,5 մլրդ-ի։ Թեև 2024-ին, 2023-ի համեմատ, այն 7 մլրդ դրամով նվազել է, 2025-ին, նախորդ տարվա համեմատ, աճել է ավելի քան 29 մլրդ դրամով։ Եթե այս տարի նախատեսվել էր իրականացնել 5 բյուջետային ծրագիր՝ 20 միջոցառումներով, ապա 2026-ին հատկացվող 37,3 մլրդ դրամից 31,2 մլրդ-ով իրականացվելու է 4 բյուջետային ծրագիր՝ 16 միջոցառումներով։ 

Օրերս Փաշինյանը «Սիլիկոնային սարեր 2025» տեխնոլոգիական գագաթնաժողովի բացմանը խոսում էր տեղեկատվական տեխնոլոգիաների ոլորտում Կառավարության կարևոր հանձնառության մասին։ Այդ դեպքում ինչո՞ւ է կրճատվում գերակա հռչակված ոլորտի ֆինանսավորումը․  պարզվում է՝ Կառավարությունը նախատեսում է կրճատել  Բարձր տեխնոլոգիական արդյունաբերության էկոհամակարգի և շուկայի զարգացման ծրագիրը, որի համար նախատեսվում է հատկացնել 21,1 մլրդ դրամ։ Այս տարի նույն ծրագրի համար 32,8 մլրդ դրամ պետք է ծախսվեր։ ԲՏԱ էկոհամակարգի և շուկայի զարգացման ծրագիրը մի շարք միջոցառումներ է ընդգրկում՝  պետություն-մասնավոր համագործակցությունից մինչև ՏՏ դասընթացներ և մասնագետների վերապատրաստում։ 

Ազգային ժողովի ընդդիմադիր պատգամավոր Թադևոս Ավետիսյանի խոսքով՝ նախարարության բյուջեի 10 մլրդ դրամ կրճատումը, թվում է, փոքր թիվ է, սակայն ընդհանուր բյուջեի մեջ այն բավական մասնաբաժին ունի։ Պատգամավորի խոսքով՝ Կառավարությունը ձախողում է ծրագրերը, որն էլ արտահայտվում է բյուջեի վրա։

ԲՏԱ նախարարության ներկայացրած բյուջեն չի ընդգրկում ռազմարդյունաբերության և տիեզերական գործունեության ոլորտը, դրանք ԱԺ-ում կքննարկվեն առաջիկայում։ 

Տարեսկզբին CivilNET-ը պարզել էր, որ Կառավարությունը 2024-ի 9 ամիսներին չի կարողացել ապահովել ռազմարդյունաբերության ոլորտի բյուջեի կատարողականը․ 2024-ի տարեկան պետբյուջեով ռազմարդյունաբերության ոլորտի համար պլանավորված 5,82 մլրդ դրամից փաստացի ծախսվել էր ընդամենը 1,5 մլրդ-ը, որը կազմում է տարեկան պլանի ընդամենը 25 տոկոսը։ Պարզվել է, որ նախարարությունը ցածր կատարողական է ապահովել էկոհամակարգի և շուկայի զարգացման և Թվային փոխակերպման գործընթացի իրականացման ծրագրերում։ Նկատենք, որ մյուս տարվա բյուջեի հիմնական կրճատումը վերաբերում է հենց այս ոլորտներին։ 

Մանրամասները՝ տեսանյութում։

Անի Թամրազյան