Եվրանեսթի պատմության մեջ առաջին անգամ մեր կողքին չենք տեսնում վրացի գործընկերներին․ Ռասա Յուկնևիչենե․ ՏԵՍԱՆՅՈՒԹ

Ազգային ժողովում ընթանում է «Եվրանեսթ» խորհրդարանական վեհաժողովի 12-րդ լիագումար նստաշրջանի նիստը, որին ողջույնի խոսքով հանդիես եկավ Եվրախորհրդարանի պատգամավոր Ռասա Յուկնևիչենեն։

Նա անդրադարձավ Արևելյան գործընկերության երկրների զարգացմանը, որի գլխավոր նպատակը Եվրամիության մերձեցումն է նախկին ԽՍՀՄ 6 հանրապետությունների հետ՝ Ուկրաինա, Մոլդովա, Ադրբեջան, Հայաստան, Վրաստան և Բելառուս։ Յուկնևիչենեն խոսեց անկախանալու բարդ գործընթացի մասին, նշեց՝ այս նիստի շրջանակներում նաև խոսելու են տեղին ոնեցածի ազդեցությունների, ՌԴ նախագահ Վլադիմիր Պուտինի իշխանության գալու, ինչպես նաև` ՌԴ ազդեցության տակ մնացած երկրների մասին, որոնք «այժմ տառապում են»։

«Իհարկե, դրական զարգացումներ նույնպես եղել են։ Այսօր Հայաստանում, Երևանում նույնպես կարևորագույն զարգացումներ ենք նկատում, նոր հնարավորություններ են ստեղծվում խաղաղության համար։  Այդ զարգացումները կարելի է պատմական անվանել։ Մյուս կողմից մենք տեսնում ենք Վրաստանի օրինակը։ Ինձ շատ ցավալի է մեր զեկույցներում կարդալ այն ամենը, ինչ տեղի է ունենում այնտեղ։ Ցավալի է նման գնահատականներ կարդալ մի երկրի մասին, որը տարիներ առաջ առաջատար երկիր էր, երբ խոսքը  Արևելյան գործընկերության, բարեփոխումների մասին է։ Եվրանեսթի պատմության մեջ առաջին անգամ մենք մեր կողքին չենք տեսնում վրացի գործընկերներին»,-նշեց պատգամավորը։

Ավելի վաղ հայտնի էր դարձել, որ Վրաստանը հրաժարվել է մասնակցել Եվրանեսթի Խորհրդարանական վեհաժողովի 12-րդ լիագումար նստաշրջանին, որն ընթանում է Հայաստանում։ Վրաստանի խորհրդարանի եվրոպական ինտեգրման հարցերով հանձնաժողովի նախագահ Լևան Մախաշվիլիի նամակում՝ ուղղված Եվրանեսթ Խորհրդարանական վեհաժողովին, հայտնել է, որ Եվրանեսթ ԽՎ-ի «վերջին գործողությունները լուրջ մտահոգություններ են առաջացնում՝ Վեհաժողովի հիմնադիր ակտի և Պրահայի Արևելյան գործընկերության գագաթնաժողովի համատեղ հռչակագրի հիմնարար սկզբունքների և նպատակների հետ դրանց անհամապատասխանության պատճառով»։ Ըստ Մախաշվիլիի՝ բազմակողմ երկխոսությունը, որը «նախկինում լայնորեն աջակցվում էր Վեհաժողովի մասնակիցների կողմից, ցավոք, անցյալում է»։

Եվգենյա Համբարձումյան