11.09.2026 | 23:28
Վարչապետը խարույկի շուրջ հանդիպում է ունեցել հեծանվավազքի «Վարչապետի գավաթ»-ի մասնակիցների հետ
Վերացնելով դեպի ՀՀ տարանցման սահմանափակումները՝ Բաքուն նպաստել է վստահության վերականգնմանը․ Ադրբեջանի վարչապետ
Քաղաքականություն
22.10.2025 | 11:18
Դեպի Հայաստան բեռների տարանցման սահմանափակումները վերացնելով՝ Ադրբեջանը ներդրում է ունեցել տարածաշրջանում համագործակցության և վստահության վերականգնմանը։ Այս մասին հայտարարել է Ադրբեջանի վարչապետ Ալի Ասադովը Թբիլիսիում անցկացվող «Մետաքսի ճանապարհ» 5-րդ համաժողովում ունեցած ելույթում։
Նա նշել է, որ խաղաղության գործընթացի օրակարգի շուրջ Ադրբեջանի և Հայաստանի միջև ձեռք բերված համաձայնությունները պատմական նշանակություն ունեն տարածաշրջանում կայուն համագործակցություն ապահովելու համար։
«Տարածաշրջանում հաղորդակցությունների բացումը, այդ թվում՝ Ադրբեջանի հիմնական մասը երկրի Նախիջևանի Ինքնավար Հանրապետության հետ միացումը, որը երկրի անբաժանելի մասն է, կնպաստի տարածաշրջանի միջազգային բեռնափոխադրումների տարանցիկ հզորությունների ընդլայնմանը: Մենք վստահ ենք, որ այս տարվա օգոստոսի 8-ին Վաշինգտոնում ձեռք բերված համաձայնագրերի հիման վրա տարածաշրջանում բացվող նոր երթուղին կդառնա Միջին միջանցքի հիմնական հատվածը և կնպաստի համաշխարհային տրանսպորտային ցանցում նրա դերի բարձրացմանը»,- ասել է Ասադովը։
Նա հավելել է, թե Ադրբեջանը շարունակում է ցուցադրել տարածաշրջանում համագործակցության և վստահության վերականգնման իր հանձնառությունը։
«Ադրբեջանն այս ուղղությամբ զգալի ներդրում է արել՝ վերացնելով Հայաստան բեռների տարանցման բոլոր սահմանափակումները։ Ղազախական հացահատիկի՝ Ադրբեջանի տարածքով Հայաստան տեղափոխումն այս ուղղությամբ առաջին գործնական քայլն է։ Ինչպես նշել է Ադրբեջանի նախագահ Իլհամ Ալիևը՝ սա ցույց է տալիս, որ խաղաղությունն այլևս միայն թղթի վրա չէ, այլ իրական կյանքում է իրականացվում»,- հայտարարել է Ասադովը։
Հիշեցնենք՝ նախօրեին Ադրբեջանի նախագահ Իլհամ Ալիևը հայտարարել էր, որ Ադրբեջանը վերացրել է Հայաստան բեռների տարանցման բոլոր սահմանափակումները։
Թարգմանությունը՝ Էմմա Չոբանյանի
