12.01.2026 | 09:48
Լարս ավտոճանապարհը փակ է
«Թրամփի երթուղին» լրացուցիչ խթան կհաղորդի Միջին միջանցքի հաջողությանը․ Թյուրքական պետությունների կազմակերպության գլխավոր քարտուղար
Քաղաքականություն
03.10.2025 | 20:59
«Թրամփի երթուղու» իրականացումը լրացուցիչ խթան կհաղորդի Միջին միջանցքի նախաձեռնության հաջողությանը։ Այս մասին ադրբեջանական իշխանամերձ APA-ին տված հարցազրույցում հայտարարել է Թյուրքական պետությունների կազմակերպության գլխավոր քարտուղար Կուբանիչբեկ Օմուրալիևը։
«Միջազգային խաղաղության և բարգավաճման Թրամփի միջանցքի (TRIPP) տեսլականը ներառում է Զանգեզուրում 43 կիլոմետրանոց ճանապարհի բացումը, որը կկապի Ադրբեջանը Նախիջևանի հետ և կկառավարվի Միացյալ Նահանգների կողմից: Այս ճանապարհը կկազմի Կենտրոնական Ասիայից Ադրբեջան, ապա՝ Թուրքիայով դեպի համաշխարհային շուկաներ տանող խոշոր առևտրային ուղու մի մասը: Մենք այս միջանցքն անվանում ենք Միջին միջանցք: Այն գտնվում է Արևելք-Արևմուտք առանցքի վրա՝ Հյուսիսային և Հարավային տրանսպորտային միջանցքների միջև, և առաջարկում է նշանակալի ռազմավարական առավելություններ երկու այլընտրանքային երթուղիների համեմատ։ Տարածաշրջանում համապարփակ խաղաղության և կայունության հաստատումը, ինչպես նաև «Թրամփի երթուղու» իրականացումը լրացուցիչ խթան կհաղորդեն Միջին միջանցքի նախաձեռնության հաջողությանը»,- ասել է նա։
Օմուրալիևն ընդգծել է Միացյալ Նահանգների հատուկ դերը Ադրբեջանի և Հայաստանի միջև խաղաղության գործընթացում։
«Մենք ողջունում ենք 2025 թվականի օգոստոսին Վաշինգտոնում ԱՄՆ նախագահի միջնորդությամբ ստորագրված համատեղ հայտարարությունը, ինչպես նաև Խաղաղության և միջպետական հարաբերությունների հաստատման մասին համաձայնագրի նախաստորագրումը։ Այս կարևոր քայլը ցույց է տալիս կողմերի վճռականությունը՝ թողնել հակամարտության ժառանգությունը և կառուցել համագործակցության ու փոխադարձ հարգանքի վրա հիմնված ապագա։ Մենք այս զարգացումը համարում ենք պատմական շրջադարձային կետ ոչ միայն Ադրբեջանի և Հայաստանի, այլև ամբողջ Հարավային Կովկասի և դրանից դուրս, որը հարթում է կայուն խաղաղության, կայունության և բարգավաճման ճանապարհը»,- ընդգծել է Թյուրքական պետությունների կազմակերպության գլխավոր քարտուղարը։
Թարգմանությունը՝ Էմմա Չոբանյանի
