Չնայած Թրամփի կոչերին՝ Թուրքիան կշարունակի գազ գնել ՌԴ-ից

Թուրքիան կշարունակի բնական գազ գնել Ռուսաստանից՝ չնայած ԱՄՆ-ի կոչերին՝ դադարեցնել ռուսական էներգակիրների ներմուծումը։ Այս մասին հայտարարել է Թուրքիայի էներգետիկայի և բնական պաշարների նախարար Ալփարսլան Բայրաքթարը CNN TÜRK-ի եթերում՝ խոսելով նավթի և գազի արդյունահանման վերջին իրավիճակի և ԱՄՆ-ի հետ կնքված էներգետիկ համաձայնագրերի մասին։

Նա նշել է, որ ԱՄՆ նախագահ Դոնալդ Թրամփը, ըստ էության, ցանկանում է վերջ դնել Ռուսաստանի և Ուկրաինայի միջև պատերազմին։ Ըստ թուրք պաշտոնյայի՝ բանակցությունները շատ երկար ժամանակ են ընթանում։ Նա հանդիպել է ՌԴ նախագահ Պուտինի հետ և կա հիասթափության զգացում այս պատերազմը դադարեցնելու անկարողության պատճառով։

Բայրաքթարի խոսքով՝ Թրամփը դրան մոտենում է այսպես. որպեսզի Ռուսաստանը դադարեցնի իր ֆինանսական ռեսուրսները, նրա ֆինանսական ռեսուրսները պետք է նվազեցվեն։

«Մենք չենք կարող մեր քաղաքացիներին ասել՝ «Մենք գազ չունենք»։ Մատակարարման անվտանգության համար մենք պետք է ապահովենք այդ ռեսուրսներին հասանելիություն առանց խտրականության։ Մենք համաձայնագրեր ունենք Ռուսաստանի հետ։ Մենք մոտենում ենք ձմռանը, պետք է ստանանք ամբողջ գազը, որը կարող ենք, այդ թվում՝ Ռուսաստանից, Ադրբեջանից և Թուրքմենստանից»,- ասել է Բայրաքթաը։

Նա նաև նշել է, որ Թուրքիայի նախագահ Ռեջեփ Թայիփ Էրդողանը հանդիպել է ՌԴ նախագահ Վլադիմիր Պուտինի հետ Շանհայի համագործակցության կազմակերպության գագաթնաժողովի շրջանակում, որի ընթացքում քննարկվել է նաև բնական գազի հարցը։ Ըստ նրա՝ դա շատ բարեկամական և կառուցողական հանդիպում է եղել:

Հիշեցնենք, որ սեպտմբերի 25-ին Սպիտակ տանը կայացած հանդիպման ժամանակ Դոնալդ Թրամփն Էրդողանին կոչ էր արել  դադարեցնել ՌԴ-ից նավթի ու գազի գնումը։

Թարգմանությունը՝ Էմմա Չոբանյանի