Կցանկանայի՝ Թուրքիան դադարեցնի ՌԴ-ից նավթի գնումը. Թրամփը` Էրդողանին

Սպիտակ տանը մեկնարկել է Թուրքիայի նախագահ Ռեջեփ Թայիփ Էրդողանի հանդիպումը ԱՄՆ նախագահ Դոնալդ Թրամփի հետ։ Նախ Թրամփը դիմավորել է Էրդողանին, ապա Օվալաձև աշխատասենյակում նրանք զրուցել են լրագրողների հետ, գրում են թուրքական լրատվամիջոցները։

«Նա կոշտ մարդ է։ Նա ինքնավստահ է։ Սովորաբար ես չեմ սիրում համառ մարդկանց, բայց ես միշտ էլ սիրել եմ նրան»,- ասել է Թրամփը Էրդողանի մասին։

Նա նշել է, որ կարծում է՝ այսօր հնարավորություն կունենան մանրամասն քննարկելու F-35-ի, F-16-ի և Halkbank հետ կապված հարցեր։

«Նա հիանալի աշխատանք է կատարում իր երկրում։ Մենք գերազանց հարաբերություններ ենք ունեցել ռազմական և առևտրի ոլորտում։ Ես կցանկանայի, որ Թուրքիան դադարեցնի Ռուսաստանից նավթ գնելը, քանի դեռ Ռուսաստանը շարունակում է իր ագրեսիան Ուկրաինայի դեմ»,- հայտարարել է Թրամփը։

Թրամփը նաև հավելել է, որ Ռուսաստանի և Ուկրաինայի նախագահներ Վլադիմիր Պուտինն ու Վլադիմիր Զելենսկին նույնպես հարգում են Էրդողանին։

«Նա կարող է մեծ ազդեցություն ունենալ Ուկրաինայի պատերազմի վրա, եթե ցանկանա, բայց նախընտրում է չեզոք մնալ»,- ասել է Թրամփը՝ ընգծելով, որ լավագույն բանը, որ կարող է անել Էրդողանը, ՌԴ-ից գազ ու նավթ չգնելն է։

Հավելենք, որ ԱՄՆ նախագահն ավելի վաղ պատրաստակամություն էր հայտնել Ռուսաստանի դեմ նոր պատժամիջոցներ կիրառել միայն այն դեպքում, եթե ՆԱՏՕ-ի երկրները (ներառյալ՝ եվրոպական) դադարեցնեն ռուսական նավթ գնելը։ Նա պարբերաբար կոչ է անում Եվրոպային դադարեցնել ռուսական նավթի գնումները՝ Ուկրաինայում պատերազմը դադարեցնելու համար։

Թարգմանությունը՝ Էմմա Չոբանյանի