Պենտագոնի ղեկավարը հարյուրավոր գեներալների կանչել է հրատապ խորհրդակցության

ԱՄՆ պաշտպանության նախարար Փիթ Հեգսեթը կարգագրել է երկրի գրեթե բոլոր բարձրաստիճան զինվորականներին սեպտեմբերի 30-ին շտապ հավաքվել Վիրջինիայի ծովային հետևակի կորպուսի բազայում: Հրամանն ուղարկվել է աշխարհում հարյուրավոր ամերիկացի գեներալների և ծովակալների։ Այս մասին հայտնել է The Washington Post-ը՝ հղում անելով աղբյուրներին, փոխանցում է DW-ի ռուսական ծառայությունը։

Տասնյակից ավելի աղբյուրներ հրավերն անվանել են «խիստ անսովոր»: Սակայն ոչ մի աղբյուր չի կարողացել բացատրել ռազմական հավաքի նպատակը։

WP-ի տվյալներով՝ Միացյալ Նահանգներում և աշխարհի տասնյակ այլ երկրներում ծառայում են ավելի քան 800 ամերիկացի գեներալներ և ծովակալներ։ Հեգսեթի հրամանը վերաբերում է բրիգադի գեներալի և ավելի բարձր կոչում ունեցող բոլոր ավագ սպաներին, նրանց ռազմածովային համարժեքներին և ավագ խորհրդականներին։ Հետևաբար, հանդիպմանը կարող է մասնակցել ավելի քան 1000 մարդ։ WP-ի աղբյուրները նշել են, որ չեն հիշում նման մասշտաբի խորհրդակցություն։

WP-ի շատ աղբյուրներ ենթադրել են, որ կարող են քննարկվել ԱՄՆ զինված ուժերի լայնածավալ կրճատումները, որոնց մասին նախկինում Հեգսեթն էր հայտարարել: Մի քանի աղբյուրներ ենթադրել են, որ կքննարկվի նոր ազգային պաշտպանության ռազմավարությունը կամ այլ հարցեր:

Պենտագոնի ներկայացուցիչ Շոն Փարնելը հաստատել է, որ Հեգսեթը «հաջորդ շաբաթվա սկզբին ելույթ կունենա բարձրաստիճան զինվորականների առջև», սակայն լրացուցիչ մանրամասներ չի հայտնել: Հստակ չէ՝ արդյո՞ք ԱՄՆ նախագահ Դոնալդ Թրամփը կմասնակցի հանդիպմանը:

Նա և ԱՄՆ փոխնախագահ Ջեյ Դի Վենսը հանդիպումը հրաժարվել են որակել որպես ինչ-որ անսովոր բան։

«Ինչո՞ւ է սա այդքան կարևոր։ Հիանալի է, երբ գեներալներն ու բարձրաստիճան պաշտոնյաները ցանկանում են գալ Միացյալ Նահանգներ՝ հանդիպելու պաշտպանության ներկայիս նախարարի հետ»,- պատասխանել է Թրամփը լրագրողների հարցերին։

Վենսը պնդել է, որ դրանում «ոչ մի առանձնապես անսովոր բան» չկա։

«Ես տարօրինակ եմ համարում, որ դուք դա այդքան մեծ պատմություն եք դարձրել»,- ասել է նա։

Թարգմանությունը` Էմմա Չոբանյանի