20.12.2025 | 11:33
Դեսպան Ղևոնդյանը և Ղազախստանի պաշտպանության նախարարը քննարկել են երկկողմ համագործակցության զարգացումը
ԵՄ հանձնակատարն Արցախ է այցելել
18.09.2025 | 17:12
Ադրբեջանի կառավարության կողմից իրականացված վերականգնողական և շինարարական աշխատանքները հիացմունք են առաջացնում։ Ադրբեջանական լրատվամիջոցների հաղորդմամբ՝ այս մասին հայաթափված Արցախում Աղդամ (Ակնա) կատարած այցի ժամանակ հայտարարել է ԵՄ ընդլայնման հարցերով հանձնակատար Մարթա Կոսը։
«Ես խորապես հուզված եմ Ղարաբաղում՝ Աղդամում գտնվելու կապակցությամբ։ Այն փաստը, որ ձեր երկիրը վերականգնում է այս տարածքը, որը տարիներ շարունակ տառապել է պատերազմից, պարզապես անհավանական է։ Կցանկանայի ընդգծել մի քանի կետ։ Նախ՝ ոչ մի պատերազմ լավ չէ, պատերազմը կյանքեր է կործանում։ Այն միշտ լի է ծանր հետևանքներով և խորը վերքերով։ Երկրորդ՝ եթե դուք խաղաղության կողմնակից եք, ապա պատերազմը պետք է դադարեցվի և խաղաղության համար կոնկրետ քայլեր ձեռնարկվեն։ Սա հենց այն է, ինչ անում են Ադրբեջանն ու Հայաստանը։ Երրորդ՝ Եվրամիությունը պատրաստ է օգնել այս հարցում»,- ասել է Կոսը։
Նա նաև հույս է հայտնել, որ «այսօր կկարողանա ստորագրել ֆինանսական համաձայնագիր, որը թույլ կտա ներդրումներ կատարել այդ տարածքում (նկատի ունի Արցախի տարածքները), մասնավորապես, առողջապահության համակարգում»։
Ադրբեջանական լրատվամիջոցները հայտնում են, որ Մարթա Կոսը տեղում հետևել է ականազերծման գործընթացին։ Եվրոպական պատվիրակությունը դիտարկել է ականապատ տարածքները և դիտել ակազերծման գործակալության կողմից իրականացվող ականազերծման աշխատանքները։
Հավելենք, որ ավելի վաղ Կոսը հանդիպել էր Ադրբեջանի նախագահ Իլհամ Ալիևին։
Սեպտեմբերի 19-ին և 20-ին էլ ԵՄ հանձնակատարը Հայաստանում կլինի։
Թարգմանությունը՝ Էմմա Չոբանյանի
