Բրյուսելը կշարունակի աջակցել կայուն խաղաղություն ապահովելու ջանքերին․ Ալիևը Բաքվում ընդունել է ԵՄ հանձնակատարին

Ադրբեջանի նախագահ Իլհամ Ալիևն այսօր Բաքվում ընդունել է Եվրամիության ընդլայնման հարցերով հանձնակատար Մարթա Կոսին: Ադրբեջանական կողմի հաղորդմամբ՝ Կոսը շնորհավորել է Ալիևին Հայաստանի և Ադրբեջանի միջև հարաբերությունների կարգավորման և խաղաղության օրակարգի առաջխաղացման գործում ձեռք բերված հաջողությունների համար։ Նա նշել է, որ Եվրամիությունը կշարունակի աջակցել տարածաշրջանում կայուն խաղաղություն ապահովելուն ուղղված ջանքերին և Ադրբեջանի գործունեությանը մարդասիրական ականազերծման ոլորտում։

Կոսն ասել է, որ Եվրամիության և Ադրբեջանի միջև էներգետիկայի ոլորտում հաջող համագործակցություն է հաստատվել, ինչպես նաև ընդգծել, որ տրանսպորտի ոլորտում համագործակցության հետագա զարգացման մեծ հեռանկարներ կան։

Իլհամ Ալիևը գոհունակությամբ է հիշել այս տարվա մայիսին Տիրանայում ԵՄ Խորհրդի նախագահ Անտոնիո Կոշտայի և Եվրահանձնաժողովի նախագահ Ուրսուլա ֆոն դեր Լեյենի հետ իր հանդիպումը։ Նշելով, որ տարածաշրջանում տրանսպորտային կապեր հաստատելու լավ հնարավորություններ կան, Ալիևն ասել է, թե «Ադրբեջանն ինտենսիվ աշխատանքներ է իրականացնում  ազատագրված տարածքներում ճանապարհային և տրանսպորտային ենթակառուցվածքների կառուցման ուղղությամբ»։

Այս առումով նա ընդգծել է Զանգիլան տանող ավտոմոբիլային և երկաթուղային գծերի կարևորությունը։

Հանդիպման ժամանակ նշվել է, որ Միջին միջանցքից և Կենտրոնական Ասիայից Ադրբեջան մտնող բեռների ծավալի զգալի աճ կա և կարծիքներ են փոխանակվել փոխադարձ հետաքրքրություն ներկայացնող հարցերի շուրջ։

Հավելենք, որ Մարթա Կոսը հանդիպելու է Ադրբեջանի մի շարք այլ պաշտոնյաների, նաև այցելելու է Աղդամ։

Թարգմանությունը՝ Էմմա Չոբանյանի