19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
Ավետ Բաբայանը խիստ նկատողություն է ստացել Ավինյանից․ քաղաքապետը նրան արձակուրդ է ուղարկել
Քաղաքականություն
17.09.2025 | 16:46
Երևանի քաղաքապետարանի աշխատակազմի հասարակական կարգի պահպանության ծառայության պետի պաշտոնակատար Ավետիք Բաբայանը խիստ նկատողություն է ստացել վերադասից՝ Երևանի քաղաքապետ Տիգրան Ավինյանից։
Ավետիք Բաբայանը մեզ հետ զրույցում ասաց՝ նկատողությունն ընդունենք ի գիտություն։
Երևանի քաղաքապետի մամուլի քարտուղար Հայկ Կոստանյանն ասաց, որ Բաբայանը զեկուցագիր է ներկայացրել Տիգրան Ավինյանին, քաղաքապետն էլ արձակուրդ է ուղարկել ենթակային։
«Երևանի քաղաքապետը տեղյակ չի եղել Բաբայանի ու Կարապետյանի խոսակցություններից։ Կարապետյանի ֆեյսբուքյան հրապարակումից հետո մենք ճշտել ենք, և պարոն Բաբայանի կողմից ներկայացվել է զեկուցագիր։ Բաբայանը հանրային ծառայող է և վարքականոնի խախտում է թույլ տվել, ինչի հիմքով էլ խիստ նկատողության է արժանացել։ Հաշվի առնելով նաև այն հանգամանքը, որ ծեծկռտուքը հաջորդել է խոսակցություններին և Հակոբ Կարապետյանը դրանք կապում է իրար հետ, Բաբայանի արձակուրդ գնալը պայմանավորված է նաև նրանով, որ ինքը չզբաղվի իր բուն ծառայողական պարտականություններով»,- պարզաբանեց Կոստանյանը։
Ավետիք Բաբայանից հարցրինք՝ արդյոք Տիգրան Ավինյանն ասել է, որ արձակուրդից հետո չվերադառնա, արձագանքեց։
«Ինձ նման բան ոչ ոք չի ասել, երևի երկու շաբաթ կտևի արձակուրդը»,- ասաց Բաբայանը՝ այլ հարցերի չպատասխանելով։
Քաղաքապետի մամուլի քարտուղարն էլ հավելեց՝ դեռ պիտի համոզվեն՝ որքանով Ավետիք Բաբայանը կապ ունի այս ամենի հետ։ Նշենք, որ ֆիզիկական ներգործության հատկանիշներով քրեական վարույթ է նախաձեռնվել։ Հակոբ Կարապետյանը հարցաքննվել է, նախաքննական մարմնից փորձեցինք ճշտել նաև՝ հարցաքննվե՞լ է Ավետք Բաբայանը, ասացին, որ չեն կարող տեղեկատվություն տրամադրել։
Հիշեցնենք, որ երկու օր առաջ Երևանի քաղաքապետի նախկին խոսնակ, լրագրող Հակոբ Կարապետյանը ֆեյսբուքյան գրառմամբ հայտնել էր, որ հայհոյախառն ու սպառնալից հաղորդագրություններ է ստացել Ավետ Բաբայանից, որին հաջորդել է իր վրա հարձակումը։ Կարապետյանի խոսքով՝ աշխատավայրի մոտ անհայտ անձը ծեծի է ենթարկել իրեն, վստահ է՝ կազմակերպիչը հենց Ավետ Բաբայանն է։ Ինքը՝ Բաբայանը երեկ մեզ հետ զրույցում հերքել էր Կարապետյանի այս պնդումները։
Արփի Հակոբյան
