03.04.2026 | 23:13
NASA-ն հրապարակել է Երկրի նոր լուսանկարը
Լատվիան փակում է Ռուսաստանի և Բելառուսի հետ օդային սահմանը մինչև 6 կմ բարձրությունը
Քաղաքականություն
11.09.2025 | 18:26
Լատվիան կփակի օդային տարածքը Բելառուսի և Ռուսաստանի հետ իր արևելյան սահմանին։ Այս մասին հայտարարել է հանրապետության պաշտպանության նախարար Անդրիս Սպրուդսը։ Սահմանափակումները ուժի մեջ կլինեն մինչև սեպտեմբերի 18-ը՝ երկարաձգման հնարավորությամբ և կտարածվեն մինչև 6 կիլոմետր բարձրության վրա, գրում է DW-ի ռուսական ծառայությունը։
«Եթե ինչ-որ մեկը բարձրանա ավելի բարձր, այդ օդային երթևեկությունը կշարունակվի։ Սպառնալիքը գալիս է ցածր բարձրություններում գործող անօդաչու համակարգերից», – բացատրել է Սպրադսը։ Նա ասել է, որ այս միջոցառումը կընդլայնի օդային հսկողության համակարգերի փորձարկման, անօդաչու թռչող սարքերի գործողությունների մոդելավորման և դրանց դեմ պայքարի, ինչպես նաև մոբիլ մարտական ստորաբաժանումներ տեղակայելու և մարզելու հնարավորությունները։
Թռիչքների սահմանափակումները քննարկվել են նախորդ օրը Լատվիայի Ազգային անվտանգության խորհրդի նիստում: Երկրի վարչապետ Էվիկա Սիլինան նշել է. «Լեհաստանում տեղի ունեցած իրադարձությունները մեզ ցնցել են»: Նա հավելել է, որ արգելքը վերաբերում է միայն սահմանային գոտուն. «AirBaltic-ի ինքնաթիռները կթռչեն, անհանգստանալու բան չկա»:
Միևնույն ժամանակ, Լեհաստանը նույնպես ուժեղացնում է անվտանգության միջոցառումները: Սեպտեմբերի 12-ի գիշերը երկիրը պլանավորում է ամբողջությամբ փակել Բելառուսի հետ սահմանը՝ կապված ռուս-բելառուսական «Զապադ-2025» զորավարժությունների մեկնարկի հետ:
Սեպտեմբերի 11-ին Լեհաստանի ՆԳ նախարար Մարցին Կերվինսկին ընդգծել է, որ սահմանը փակելու որոշումը կլինի անորոշ ժամանակով և ուղղակիորեն կապված չէ զորավարժությունների հետ: «Մենք մտահոգված ենք լայն իմաստով սադրանքներից։ Այստեղից էլ այս կոշտ որոշումը»,- ասել է նա:
Լեհական իշխանությունները նաև երեք ամսով սահմանափակել են թռիչքները Բելառուսի և Ուկրաինայի հետ սահմանային գոտիներում: Լեհաստանի օդային նավիգացիայի ծառայությունների գործակալությունը (PANSA) հայտարարել էր, որ սահմանափակումները ուժի մեջ կմնան մինչև դեկտեմբերի 9-ը ներառյալ: Բացառություններ են նախատեսված նախնական թույլտվությամբ օդաչուական ինքնաթիռների, ինչպես նաև պետական ավիացիայի և արտակարգ իրավիճակների ծառայությունների թռիչքների համար:
Որոշումը կայացվել է սեպտեմբերի 10-ի գիշերը ռուսական անօդաչու թռչող սարքերի Լեհաստան ներխուժումից հետո։ Այդ ժամանակ, ըստ Վարշավայի, առնվազն 19 անօդաչու թռչող սարք է հատել Լեհաստանի սահմանը Ուկրաինայի վրա զանգվածային հարվածների ժամանակ։ Լեհական ինքնաթիռներից բացի, ՆԱՏՕ-ի կործանիչներն օգտագործվել են նաև դրանք Ուկրաինայում պատերազմի սկսվելուց ի վեր առաջին անգամ որսալու համար։ Ավելի ուշ Լեհաստանում հայտնաբերվել են 16 անօդաչու թռչող սարքերի մնացորդներ։ Դրանցից մեկը ընկել է Բելառուսի և Ուկրաինայի սահմանի մոտ գտնվող Վիրիկի գյուղի բնակելի շենքի վրա։ Զոհեր չեն եղել։
Լեհաստանի վարչապետ Դոնալդ Տուսկը հայտարարել է, որ «սահմանը հատվել է», և երկիրն այժմ «ավելի մոտ է ռազմական հակամարտությանը, քան Երկրորդ համաշխարհային պատերազմից ի վեր ցանկացած պահի»։ Ի պատասխան՝ Ռուսաստանի պաշտպանության նախարարությունը հայտարարել է, որ «չի պլանավորել» հարվածներ Լեհաստանի վրա, իսկ ԱԳՆ-ն էլ նշել, որ Մոսկվան «հետաքրքրված չէ սրմամբ»։
Թարգմանությունը՝ Էմմա Չոբանյանի
