Թրամփը հայտնել է Պուտինի հետ առաջիկա զրույցի մասին

ԱՄՆ նախագահ Դոնալդ Թրամփը պլանավորում է առաջիկայում զրուցել Ռուսաստանի նախագահ Վլադիմիր Պուտինի հետ։

«Այո՛, ես դա կանեմ։ Մեզ մոտ շատ լավ երկխոսություն է ստացվել», – ասել է Թրամփը Սպիտակ տանը կայացած ճեպազրույցի ժամանակ, հայտնում է DW-ի ռուսական ծառայությունը։

Միաժամանակ,  ըստ Ռուսաստանի նախագահի մամուլի քարտուղար Դմիտրի Պեսկովի, Կրեմլը դեռևս չունի «զարգացումներ Ռուսաստանի Դաշնության և Միացյալ Նահանգների նախագահների միջև հեռախոսազրույց կազմակերպելու մասով», սակայն այն կարող է «արագ կազմակերպվել», հաղորդում է «Ինտերֆաքսը»։

Ավելի վաղ Դոնալդ Թրամփը հեռախոսազրույցներ է ունեցել Ուկրաինայի նախագահ Վլադիմիր Զելենսկիի և «կամավորների կոալիցիայի» ներկայացուցիչների հետ՝ Ուկրաինայի առաջնորդի Փարիզ կատարած այցի ընթացքում, որտեղ նրանք քննարկել են Կիևի անվտանգության երաշխիքները:

Reuters-ի փոխանցմամբ՝ մեկ ժամ տևած հեռախոսազրույցի ընթացքում ԱՄՆ նախագահը կոչ է արել եվրոպացի առաջնորդներին դադարեցնել ռուսական նավթի գնումը և տնտեսական ճնշում գործադրել Չինաստանի վրա, քանի որ այն ֆինանսական աջակցություն է ցուցաբերում Ռուսաստանի ռազմական գործողություններին Ուկրաինայում:

Վլադիմիր Զելենսկիի խոսքով՝ «կամավորների կոալիցիայի» ներկայացուցիչները համաձայնության են եկել Ուկրաինայի անվտանգության երաշխիքների ընդհանուր շրջանակի վերաբերյալ։ Նա մանրամասնել է, որ Ուկրաինայի զինված ուժերը կարևոր դեր կխաղան անվտանգության հարցում։ Բացի այդ, սեպտեմբերի 4-ին Փարիզում կայացած հանդիպման բոլոր մասնակիցները համաձայնել են, որ Մոսկվան մերժում է Ռուսաստանի կողմից Ուկրաինայի դեմ սանձազերծված պատերազմի դադարեցմանն ուղղված ցանկացած խաղաղարար նախաձեռնություն։

26 երկիր էլ մտադիր է մասնակցել խաղաղապահ առաքելությանը Ուկրաինայում հրադադարից հետո։ Այս մասին էլ հայտարարել է Ֆրանսիայի նախագահ Էմանուել Մակրոնը։

Թարգմանությունը՝ Էմմա Չոբանյանի