Կարևոր է հարաբերությունների կարգավորման համար․ Զախարովան Բաքվին կոչ է արել ազատ արձակել բանտարկված ՌԴ քաղաքացիներին

Ադրբեջանում բանտարկված Ռուսաստանի 13 քաղաքացիների ազատ արձակումը կարող է կարևոր քայլ լինել Մոսկվայի և Բաքվի միջև հարաբերությունների կարգավորման գործում: Այս մասին հայտարարել է Ռուսաստանի  ԱԳՆ պաշտոնական ներկայացուցիչ  Մարիա Զախարովան Արևելյան տնտեսական ֆորումի շրջանակներում կայացած ճեպազրույցի ժամանակ, փոխանցում է ՏԱՍՍ-ը։

«Ռուսաստանի քաղաքացիների ազատ արձակումը կարևոր քայլ է Ռուսաստանի և Ադրբեջանի միջև հարաբերություններում իրավիճակի կարգավորման ուղղությամբ», – ընդգծել է  դիվանագետը:

Նրա խոսքերով՝ թեման մանրամասն քննարկվել է օգոստոսի 22-ին Աստրախանում կայացած ռուս-ադրբեջանական տնտեսական համագործակցության միջկառավարական հանձնաժողովի նիստերի ժամանակ։

«Մեր երկրի դիրքորոշումը մանրամասնորեն ներկայացվել է ադրբեջանական պատվիրակությանը»,- ասել է նա։

Զախարովան նաև հիշեցրել է, որ Բաքվի քննչական մեկուսարանում հյուպատոսական աշխատակիցների կողմից Ռուսաստանի քաղաքացիներին արդեն երեք այցելություն է կազմակերպվել, որոնք տեղի են ունեցել հուլիսի 3-ին, 14-ին և 23-ին։

«Չորրորդ հանդիպման համար դիմում է ուղարկվել, սակայն ադրբեջանական կողմը դեռևս համաձայնություն չի տվել դրան։ Մենք ելնում ենք նրանից, որ նման համաձայնություն կստացվի»,- ասել է նա։

Միաժամանակ, Զախարովան նշել է, որ հունիսի 2-ին ռուսական կողմը խնդրել է տեղեկություններ ձերբակալված ռուս քաղաքացիների առողջական վիճակի և նրանց տրամադրված բժշկական օգնության մասին, սակայն «դեռևս պատասխան չի եղել»։

«Ելնում ենք նրանից, որ մենք  կստանանք այն», – հավելել է ՌԴ ԱԳՆ ներկայացուցիչը։

Հիշեցնենք, որ Ադրբեջանի և Ռուսաստանի հարաբերությունները սրվել են այն բանից հետո, երբ հունիսի 27-ին Եկատերինբուրգում ձերբակալվել էր ադրբեջանական ծագում ունեցող ավելի քան 50 անձ։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Բաքուն պահանջում է պատասխանատվության ենթարկել մեղավորներին։

Ռուսաստանի անվտանգության ուժերի գործողություններին ի պատասխան՝ Ադրբեջանի իշխանությունները Բաքվում ձերբակալել և ծեծի են ենթարկել 10-ից ավելի ռուսների, խուզարկություններ են անցկացրել «Sputnik Ադրբեջանի» խմբագրությունում և կալանավորել խմբագրության երկու անդամի։

Ավելի վաղ Բաքվի դատարանը մերժել էր «Sputnik Ադրբեջան»-ի լրագրողներ Իգոր Կարտավիխի և Եվգենի Բելոուսովի փաստաբանների՝ խափանման միջոցը փոխելու վերաբերյալ միջնորդությունները՝ ուժի մեջ թողնելով առաջին ատյանի դատարանի որոշումը։

Հիշեցնենք՝ նախօրեին ՌԴ նախագահ Վլադիմիր Պուտինը հայտարարել էր, որ  որ «երկրների միջև հարաբերություններում միշտ առաջացել են որոշ հարցեր՝ ելնելով ստեղծված իրավիճակից կամ որևէ քաղաքական իրավիճակից, և կան խնդիրներ»։

«Սակայն ես կարծում եմ, որ Ադրբեջանի և Ռուսաստանի միջև հիմնարար հարաբերությունները և դրանց զարգացման փոխադարձ շահագրգռվածությունը, ի վերջո, ամեն ինչ իր տեղը կդնեն»,-ասել էր ՌԴ նախագահը։

Թարգմանությունը՝ Էմմա Չոբանյանի