12.01.2026 | 01:05
«Բարսելոնան» հաղթեց «Ռեալին» ու դարձավ Իսպանիայի սուպերգավաթակիր․ ՏԵՍԱՆՅՈՒԹ
Պուտինն անդրադարձել է Ալիևին ողջունելուն և խոսել ՌԴ-Ադրբեջան հարաբերություններում առկա խնդիրներից
Քաղաքականություն
03.09.2025 | 23:16
Ռուսաստանի նախագահ Վլադիմիր Պուտինը լրագրողներին ասել է, որ Պեկինում Ճապոնիայի նկատմամբ տարած հաղթանակի 80-ամյակի և Երկրորդ համաշխարհային պատերազմի ավարտի առթիվ կազմակերպված հանդիսավոր միջոցառումների ժամանակ «երկու-երեք բառ» է փոխանակել Ադրբեջանի նախագահ Իլհամ Ալիևի հետ, գրում է ՏԱՍՍ-ը։
«Նախագահ Ալիևի հետ ողջունեցինք միմյանց, ես ողջունեցի նրան և նրա կնոջը։ Մենք երկու-երեք բառ փոխանակեցինք», – ասել է Ռուսաստանի նախագահը։
Մեկնաբանելով Մոսկվայի և Բաքվի միջև հարաբերությունների վիճակը՝ Պուտինը նշել է, որ «երկրների միջև հարաբերություններում միշտ առաջացել են որոշ հարցեր՝ ելնելով ստեղծված իրավիճակից կամ որևէ քաղաքական իրավիճակից, և կան խնդիրներ»։
«Սակայն ես կարծում եմ, որ Ադրբեջանի և Ռուսաստանի միջև հիմնարար հարաբերությունները և դրանց զարգացման փոխադարձ շահագրգռվածությունը, ի վերջո, ամեն ինչ իր տեղը կդնեն»,- ասել է Պուտինը։
Հավելենք, որ Ռուսաստանի և Ադրբեջանի նախագահներ Վլադիմիր Պուտինն ու Իլհամ Ալիևը Պեկինում կայացած տոնակատարության ժամանակ ողջունել են միմյանց, սակայն բովանդակալից շփում չի եղել։ Այս մասին ավելի ուշ հայտարարել էր ՌԴ նախագահի մամուլի խոսնակ Դմիտրի Պեսկովը։ Ողջույնի կադրերը տարածվել էին լրատվամիջոցների կողմից։
Թարգմանությունը՝ Էմմա Չոբանյանի
