Սեդրակ Առուստամյանը պահանջում է սնանկ ճանաչել Գագիկ Ծառուկյանի «Եվրասիա-Մուլտի Թրեյդ Քոմփանի» ընկերությունը

«Մուլտի Գրուպ» կոնցեռնի գլխավոր տնօրեն, տնօրենների խորհրդի նախագահ Սեդրակ Առուստամյանը պահանջում է սնանկ ճանաչել նույն կոնցեռնի հիմնադիր Գագիկ Ծառուկյանին պատանող «Եվրասիա-Մուլտի Թրեյդ Քոմփանի» ՍՊ ընկերությունը։ Սնանկ ճանաչելու դիմումը դատարան է ներկայացվել օրեր առաջ՝ օգոստոսի 25-ին (ՍնԴ/2695/04/25, դատավոր՝ Ինգա Բարսեղյան)։ Նկատենք, որ պետտուրքի գումարը 1 մլն դրամ է։ Թե ինչ հիմքով է Առուստամյանը պահանջում սնանկ ճանաչել ընկերությունը, դատական գործից դեռ պարզ չէ։

Ուշագրավ է, որ մոտ 3 ամիս առաջ՝ այս տարվա հունիսին, Կոտայքի մարզի դատարանը բավարարել էր «Հարավային տերմինալ» ՓԲԸ-ի հայցը՝ «Եվրասիա-Մուլտի Թրեյդ Քոմփանի»-ից գումար բռնագանձելու մասին։ Ըստ Դատալեքսի՝ «Եվրասիա – Մուլտի թրեյդ Քոմփանի»-ն զբաղվում է Իրանից ապրանքների ներմուծմամբ։ Ընկերությունը դրանք պահատվության է հանձնում «Հարավային տերմինալ»-ին` մինչև իր փաստաթղթերի կարգավորումը։ Հերթական անգամ՝ 2023-ի մայիսին որոշակի ապրանքներ «տրանզիտային դեկլարացիաներով» «Հարավային տերմինալ»-ին պահատվության է հանձնել, սակայն 2024թ. հուլիսից սկսած չի վճարել դրա դիմաց, գույքն էլ դեռ գտնվում է պահեստներում։ Ընկերության պարտքը մոտ 2 մլն դրամ է։

Ըստ էլեկտրոնային ռեգիստրի տվյալների՝ Գագիկ Ծառուկյանը «Եվրասիա-Մուլտի Թրեյդ Քոմփանի» ընկերության 50 % բաժնետերն է, մյուս 50 %-ը պատկանում է Իրանի քաղաքացի Արման Օլամաեի Հաջյալին։ Ընկերությունը հիմնադրվել է 2022-ի մարտին։ Կանոնադրական կապիտալը 10 հազար դրամ է, բայց 2023-ի օգոստոսին 124․9 մլրդ դրամի չափով արգելանք է դրվել Ծառուկյանին պատկանող բաժնեմասի վրա։

Ծառուկյանի 2024 թվականի գույքի և եկամոււտների հայտարարագրի համաձայն՝ վերջինս ընկերությանը  6․2 մլն եվրո փոխառություն է տվել։

Գայանե Խաչատրյան