Ֆրանսիական դատարանը Բաշար ալ-Ասադի կալանքի նոր օրդեր է տվել

Ֆրանսիական դատարանը միջազգային կալանքի օրդեր է տվել Սիրիայի նախկին նախագահ Բաշար ալ-Ասադի և նրա վեց մերձավորների համար։ Այս մասին հայտնել է France 24 հեռուստաալիքը, փոխանցում է DW-ի ռուսական ծառայությունը։

Կալանքի օրդերները տրվել են ամերիկացի լրագրող Մարի Քոլվինի և ֆրանսիացի լուսանկարիչ Ռեմի Օքլիի մահվան հետ կապված, որոնք զոհվել են 2012 թվականին կառավարական զորքերի կողմից սիրիական Հոմս քաղաքի ռմբակոծության ժամանակ։ Ֆրանսիայի կառավարությունն այս հարվածները որակում է որպես մարդկության դեմ հանցագործություն և ռազմական հանցագործություն։

Ասադից բացի՝ ֆրանսիական դատարանը կալանքի օրդեր է տվել նրա եղբոր՝ Մահեր Ասադի համար, որը սիրիական բանակի 4-րդ զրահատանկային դիվիզիայի հրամանատարն է եղել , ինչպես նաև սիրիական հետախուզության նախկին ղեկավար Ալի Մամլուքի և երկրի զինված ուժերի գլխավոր շտաբի նախկին պետ Ալի Այուբի համար։

Բաշար ալ-Ասադը Սիրիայի նախագահն էր 2000-ից մինչև 2024 թվականը։ 2011 թվականին նա ուժով ճնշել էր  կառավարության դեմ բողոքի ցույցերը, որից հետո երկրում սկսվել էր քաղաքացիական պատերազմ։ 2015 թվականից ի վեր Ռուսաստանն ակտիվորեն օգնում է Ասադին։ Մասնավորապես, 2016 թվականին կառավարական զորքերը կարողացան հետ գրավել Հալեպ քաղաքը Ասադի հակառակորդներից, այն բանից հետո, երբ Ռուսաստանի ռազմաօդային ուժերը քաղաքը ենթարկեցին զանգվածային ռմբակոծության։

Միջազգային կազմակերպությունները բազմիցս մեղադրել են Ասադին և նրա մերձավորներին մարդու իրավունքների խախտումների և պատերազմական հանցագործությունների մեջ, այդ թվում՝ զանգվածային մահապատիժների, քիմիական զենքի օգտագործման և քաղաքացիական օբյեկտների ռմբակոծության: 2023 թվականին Ֆրանսիայի դատարանն արդեն կալանքի օրդեր էր տվել Ասադի համար՝ քիմիական զենքի օգտագործման մեղադրանքների պատճառով։

2024 թվականի դեկտեմբերին Ասադը տապալվեց ապստամբների կողմից և փախավ Մոսկվա։ Սիրիայի նոր իշխանությունները պահանջում են նրա արտահանձնումը։ ՌԴ նախագահ Վլադիմիր Պուտինը, սակայն, հրաժարվել է արտահանձնել նրան։

Թարգմանությունը՝ Էմմա Չոբանյանի