04.04.2026 | 10:46
Լարս ավտոճանապարհը բաց է
Ավելի քան 500 ռուսական ԱԹՍ է հարձակվել Ուկրաինայի վրա
Քաղաքականություն
03.09.2025 | 11:51
Ռուսական անօդաչու թռչող սարքերը սեպտեմբերի լույս 3-ի գիշերը հարձակվել են Կիրովոգրադի մարզի Զնամենկա քաղաքի վրա, հայտնել է Ուկրաինայի արտակարգ իրավիճակների պետական ծառայությունը։
Փրկարարների տվյալներով՝ անօդաչու թռչող սարքի հարվածի հետևանքով վիրավորվել է հինգ մարդ: Շրջանային վարչակազմի ղեկավար Անդրեյ Ռայկովիչը հայտնել է, որ վնասվել է 28 տուն, մեկը՝ ավերվել: Վնասվել են նաև ենթակառուցվածքային կառույցներ։
Ռուս զինվորականները նաև հարվածել են Կիրովոգրադի մարզի երկաթուղային ենթակառուցվածքին։ «Ուկրզալիզնիցան» հայտնել է, որ վիրավորվել է չորս երկաթուղային աշխատող։ Նրանք հոսպիտալացվել են, վիճակը բավարար է։ Ենթակառուցվածքին հասցված վնասը հանգեցրել է 22 գնացքի ուշացման։
Չեռնիգովի մարզային ռազմական վարչակազմի ղեկավար Վյաչեսլավ Չաուսն էլ հայտնել է, որ հարձակման հետևանքով վնասվել է քաղաքացիական կարևորագույն ենթակառուցվածքային օբյեկտ։
Ուկրաինայի ռազմաօդային ուժերը հայտնել են, որ լույս չորեքշաբթի գիշերը ռուսական զորքերն Ուկրաինայի ուղղությամբ արձակել են 502 անօդաչու թռչող սարք (ներառյալ՝ անօդաչու թռչող սարքերի իմիտատորներ) և 24 տարբեր տեսակի հրթիռ, այդ թվում՝ 16 «Կալիբր» և 8 x-101 թևավոր հրթիռ։ Հայտարարության համաձայն՝ «խոցվել/ճնշվել է 21 հրթիռ և 430 անօդաչու թռչող սարք»: Գրանցվել է երեք հրթիռի, 69 ԱԹՍ-ի հարված 14 վայրում։
Թարգմանությունը՝ Էմմա Չոբանյանի
