19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Գեղամավանում կառուցվում է խմելու ջրի խորքային հոր, վերակառուցվում՝ ջրատար ներքին ցանցը
Տնտեսություն
03.09.2025 | 10:43
Գեղարքունիքի մարզի Սևան համայնքի Գեղամավան գյուղում ՀՀ կառավարության կողմից 2025 թվականին իրականացվող սուբվենցիոն ծրագրերի շրջանակներում կառուցվում է խմելու ջրի խորքային հոր, վերակառուցվում՝ խմելու ջրատար ներքին ցանցը։
Ինչպես տեղեկացրին Սևանի համայնքապետարանի աշխատակազմից, Գեղամավանի խորքային հորի կառուցման և խմելու ջրատար ներքին ցանցի վերակառուցման ծրագրի պայմանագրային արժեքը կազմում է 37 միլիոն 770 հազար դրամ, որի 75 տոկոսը հատկացնում է ՀՀ կառավարությունը, 25 տոկոսը՝ Սևանի համայնքապետարանը։
Աշխատանքները ներառում են 3251 գծամետր ջրագծի վերակառուցման և խորքային հորի կառուցման բաղադրիչներ: Շինաշխատանքների ընթացքում կկառուցվի խորքային հորի սանիտարական գոտու ցանկապատ:
Ծրագրի շնորհիվ հնարավոր կլինի կանխել ջրի առկա կորսուստները, վերակառուցել ներհամայնքային ջրագծերը, ինչպես նաև վերակառուցել ՕԿՋ-ից մինչև բնակավայրի մի քանի փողոց տանող ջրագծերը, որոնց վրա նախատեսվում է նաև դիտահորի կառուցում:
Գեղամավանում իրականացվող ծրագրի կապալառուն «ԱՍ-777» ՍՊԸ-ն է:
«Կենսական նշանակություն ունեցող այս ենթածրագրի շնորհիվ հնարավոր կլինի լուծել բնակավայրում տասնամյակներով առկա առաջնահերթություն ներկայացնող խնդիրը, որը նպաստելու է բնակիչների կյանքի որակի և կենցաղավարության բարելավմանը»,-հավաստեցին Սևանի համայնքապետարանի աշխատակազմից:
