08.06.2026 | 06:41
Ամփոփվել են 1283 ընտրատեղամասերից ստացված նախնական արդյունքները. ԿԸՀ
ՌԴ Ռոստովի մարզում երկաթուղային կայարանի վրա ԱԹՍ-ների հարձակման հետևանքով 26 գնացքի մեկնումը հետաձգվել է
03.09.2025 | 12:22
ՌԴ Պաշտպանության նախարարությունը հայտնել է ուկրաինական 105 ԱԹՍ-ի խոցման մասին հինգ շրջաններում, բռնակցված Ղրիմում, Սև ու Ազովի ծովերում, փոխանցում է Current time-ը։
Գերատեսչության տվյալներով՝ Ռոստովի մարզում ոչնչացվել է 25 անօդաչու թռչող սարք։ Նահանգապետի պաշտոնակատար Յուրի Սլյուսարը հայտնել է, որ Կուտեյնիկովո երկաթուղային կայարանում տեղի ունեցած հարձակումը խաթարել է ցանցի աշխատանքը։
«Կայարանի շենքի տանիքին չպայթած զինամթերքի պատճառով գիշերն այնտեղից տարհանվել են ուղևորներն ու աշխատակիցները։ Ոչ ոք չի տուժել։ Շենքն այժմ շրջափակված է։ Կանչվել են սակրավորներ»,- գրել է նա։
«Ռուսական երկաթուղիներ»-ի տվյալներով՝ 26 ուղևորատար գնացք է ուշացել։
Բելայա Կալիտվա քաղաքում էլ խոցված անօդաչու թռչող սարքի բեկորները վնասել են շենքի ճակատային մասը, կոտրել երկու բնակելի շենքերի պատուհանները, ինչպես նաև բակերում կայանված մեքենաներ: Կոկսովի բնակավայրում մի քանի մասնավոր տների պատուհաններ են վնասվել: Սլյուսարի հաղորդմամբ՝ ոչ ոք չի տուժել:
Թարգմանությունը՝ Էմմա Չոբանյանի
