Քոչարյանին և Տեր-Պետրոսյանին միավորել է Փաշինյանի դեմ հակակրանքը․ իրականացվում է այն, ինչ իրենք չկարողացան․ Լուսինե Բադալյան. ՏԵՍԱՆՅՈՒԹ

ԱԺ «Քաղաքացիական պայմանագիր» խմբակցության պատգամավոր Լուսինե Բադալյանը Factor TV-ի հետ զրույցում կարծիք է հայտնում, որ խոշոր գումարներով ձայներ գնելու պրակտիկան մնացել է անցյալում և 2026-ի ընտրություններում վճռորոշ դեր չի կատարելու։ Ռուսաստանաբնակ գործարար Սամվել Կարապետյանը, ըստ նրա, թեև մեծահարուստ է, սակայն կրկնում է ՀՀ գործող ԱԺ ընդդիմության նարատիվները, և ՔՊ-ն չունի վախեր՝ կորցնելու իշխանությունը:

«Ժողովրդին փողով գնելն անհնար է դարձել, Կարապետյանն իր փողերն ի՞նչ է անելու, դա մեծ դերակատարում չի ունենալու։ Կարապետյանն ինքնակամ չի որոշել մտնել քաղաքական դաշտ, և նա վերջինը չի լինելու, որ ինչ-որ հանձնարարություններով գալիս է։ Սամվել Կարապետյանն ի՞նչ է ասում, ՌԴ-ի՞ն էր պետք միջանցք տալ․ միջանցք չենք տվել ո՛չ ԱՄՆ-ին, ո՛չ որևէ այլ մեկին»,- ասաց իշխանական պատգամավորը։

Ըստ նրա՝ երբեմնի քաղաքական հակառակորդներ Ռոբերտ Քոչարյանին և Լևոն Տեր-Պետրոսյանին միավորել է Փաշինյանի դեմ հակակրանքը, որն այսօր փաստացի իրականացում է այն, ինչ իրենք չկարողացան․  «Աբսո՛ւրդ է, ընդդիմությունը կապիտուլյացիա է կոչում փաստաթուղթը, որի հիմքում ՀՀ-ի ինքնիշխանությունն է և տարածքային ամբողջականությունը։ Շատ կարևոր բան կատարվեց՝ խաղաղություն է հաստատվել․ 44-օրյայի և այլ պատերազմների փուլն ավարտված է»։

Բադալյանը հավաստիացնում է, որ իշխանությունը սահմանադրական հանրաքվեում շանտաժի միջոցի չի դիմելու։

«Ստորություն է՝ ժողովրդին ասել, կողմ քվեարկեք վատ Սահմանադրությանը, որ պատերազմ չլինի․ մենք այդքան տականք չենք, ժողովուրդն էլ հիմար չէ»,- ասաց նա։

Հարցազրույցն ամբողջությամբ՝ տեսանյութում։

Ռոբերտ Անանյան