Զախարովան անդրադարձել է Փաշինյանի՝ Մոսկվա հնարավոր այցին

Ռուսաստանը պատրաստ է Հայաստանին ատոմային էներգիայի զարգացման տարբերակներ առաջարկել։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան այսօրվա ճեպազրույցում։

Նա, մասնավորապես, անդրադարձել է հարցին, որ սեպտեմբերի վերջին Մոսկվայում կանցկացվի Ատոմային շաբաթը, որին մասնակցության հրավեր է ուղարկվել նաև ՀՀ վարչապետ Նիկոլ Փաշինյանին։ Հարցին՝ արդյո՞ք նա ժամանելու է, Զախարովան պատասխանել է՝ դա պետք է հարցնել հայկական կողմին։ Նա նշել է՝ «ռուսական կողմը նախապատրաստական աշխատանքներ է տանում, պատասխաններ են ստացվել, չեն բացառում Հայաստանի վարչապետի այցը»։

Զախարովան անդրադարձել է նաև ատոմային ոլորտում ՀՀ-ի հետ համագործակցությանը։

«Մենք տեսնում ենք հայկական կողմի շահագրգռվածությունը խաղաղ միջուկային ոլորտում համագործակցությունը շարունակելու հարցում: Մեծամորի ԱԷԿ-ի հիմնադրումից ի վեր կես դար շարունակ մեր մասնագետները սերտորեն փոխանակվել են փորձով»,- ասել է նա՝ նշելով, որ «Ռոսատոմը» ներկայում աշխատում է հայ գործընկերների հետ՝ գործող կայանի շահագործումը մինչև 2036 թվականը երկարաձգելու ուղղությամբ, քննարկում է նոր էներգաբլոկների կառուցման հեռանկարները, և որ «Ռոսատոմի» ղեկավարությունը կանոնավոր կապ է պահպանում երկրի կառավարության հետ։

Ըստ Զախարովայի՝ Ռուսաստանը պատրաստ է առաջարկել ատոմային էներգիայի զարգացման տարբերակներ՝ փոքր մոդուլային ռեակտորներից մինչև նոր խոշոր կայանի կառուցում։ Ռուսաստանցի պաշտոնյան նաև հայտարարել է, թե Մոսկվան արձանագրում է «արևմտյան երկրների չարամիտ փորձերը»՝ վարկաբեկելու ռուս-հայկական համագործակցությունը միջուկային ոլորտում։

Բացի այդ, նաև հայտարարել է, որ Հայաստանի, Ռուսաստանի և Ադրբեջանի միջև 2020-2022 թվականներին կնքված եռակողմ համաձայնագրերը մնում են արդիական՝ անդրադառնալով Վաշինգտոնում կնքված փաստաթղթերին։ Նա նշել է, որ  հայկական կողմը մանրամասների մասին տեղեկացրել է։

«Տարածաշրջանից դուրս խաղացողների ներգրավումը չպետք է խթանի հակամարտության ներուժը և ստեղծի նոր բաժանարար գծեր։ Այս մոտեցումը վերաբերում է տարածաշրջանային հաղորդակցությունների ապաշրջափակմանը»,- ասել է նա։

Թարգմանությունը՝ Էմմա Չոբանյանի