Միջազգային իրավական հարցերով գրասենյակի մամուլի խոսնակն աշխատանքից ազատման դիմում է գրել

Ի տարբերություն Լիպարիտ Դրմեյանի, որին ազատել են ՀՀ Միջազգային իրավական հարցերով գրասենյակի ղեկավարի պաշտոնից ոչ սեփական դիմումի համաձայն, ես դադարեցնում եմ գործունեությունս իմ սեփական դիմումի համաձայն: Այս մասին ֆեյսբուքյան գրառմամբ տեղեկացրել է գրասենյակի մամուլի քարտուղար Հասմիկ Սամվելյանը։

Հիշեցնենք՝ այսօր առավոտյան վարչապետ Նիկոլ Փաշինյանի որոշմամբ աշխատանքից ազատվել է Միջազգային իրավական հարցերով ներկայացուցչի գրասենյակի ղեկավար Լիպարիտ Դրմեյանը։ Ըստ ամենյանի, սա պայմանավորված է երեկ Կառավարության նիստից հետո ճեպազրույցի ժամանակ Փաշինյանի հետևյալ արտահայտությամբ․ «Կառավարությունը ես եմ, եթե իմ դիրքորոշմանը հակասող կա, թող հենց հիմա դիմում գրի՝ գնա»։

Փաշինյանն այս արտահայտությունն արել էր՝ արձագանքելով դիտարկմանը, թե Կառավարությունն ընդունել է, որ Ստոկհոլմի արբիտրաժի որոշումը ենթակա է պարտադիր կատարման։

Հիշեցնենք՝ երեկ համացանցում փաստաթուղթ էր հայտնվել, ըստ որի՝ Միջազգային իրավական հարցերով ներկայացուցչի գրասենյակ ղեկավար Լիպարիտ Դրմեյանը դիմել է ՀԾԿՀ նախագահին՝ պահանջելով կատարել Ստոկհոլմի որոշումը։

«Արբիտրաժային վճիռը կողմերի կողմից ենթակա է անհապաղ պարտադիր կատարման»,- գրել է Դրմեյանն իր պատասխանում։

Իր հերթին, ՀԷՑ-ի տնօրենի նախկին պաշտոնակատար Դավիթ Ղազինյանը մամուլի ասուլիսի ժամանակ ասել էր, թե Կառավարությունն ընդունել է, որ Ստոկհոլմի դատարանի որոշումը ենթակա է պարտադիր կատարման։