20.08.2026 | 20:22
Վարդենիսում մի կին ասաց, որ իր կյանքի առաջին 15 հազարն է աշխատել, հուզվել էի․ Լիանա Մանուկյան. ՏԵՍԱՆՅՈՒԹ
Ադրբեջանը սպասում է, որ ՀՀ-ն փոխի Սահմանադրությունը՝ խաղաղության համաձայնագիրը ստորագրելու համար. Բայրամով
Քաղաքականություն
26.08.2025 | 18:23
Չնայած Հայաստանի և Ադրբեջանի միջև խաղաղության պայմանագրի նախաստորագրմանը՝ Բաքուն շարունակում է նախապայմաններ առաջ քաշել համաձայնագրի ստորագրման համար։ Մասնավորապես, Ադրբեջանի ԱԳ նախարար Ջեյհուն Բայրամովը երկրի նախագահ Իլհամ Ալիևի՝ Վաշինգտոն կատարած այցի արդյունքներին նվիրված կառավարության հատուկ նիստում հայտարարել է, թե Բաքուն սպասում է, որ Երևանը փոփոխություններ կկատարի ՀՀ Սահմանադրության մեջ և լիովին կվերացնի Ադրբեջանի նկատմամբ տարածքային պահանջները՝ խաղաղության համաձայնագիր ստորագրելու համար։
Նա նաև նշել է, որ Վաշինգտոնում ստորագրված համատեղ հռչակագրում հատկապես ընդգծվում է Նախիջևանի հետ անխոչընդոտ հաղորդակցության կարևորությունը՝ որպես Ադրբեջանի անբաժանելի մաս։
««Զանգեզուրի միջանցքը» («Թրամփի երթուղի»), որի մի մասը կանցնի Հայաստանի տարածքով, կապահովի Ադրբեջանի ներսում ամբողջական կապը և տարածաշրջանային տնտեսական ինտեգրումը։ Այս նախագիծը նաև կընդլայնի տարածաշրջանային առևտրի և տրանսպորտային հնարավորությունները»,- ընդգծել է Բայրամովը։
Հավելենք, որ օգոստոսի 8-ին Վաշինգոտնում ՀՀ-ի, Ադրբեջանի ու ԱՄՆ-ի եռակողմ գագաթնաժողովի ընթացքում ստորագրված փաստաթղթերում, այսպես կոչված, «Զանգեզուրի միջանցք» գոյություն չունի, սակայն ադրբեջանական կողմը շարունակում է օգտագործել այս եզրույթը։
Բացի այդ, Բայրամովը խոսել է Թուրքիայի դերակատարումից։
«Թուրքիան միջազգային մակարդակով աջակցել է Ադրբեջանի արդարացի դիրքորոշմանը, գործընթացում համակարգված քայլերը դրական ներդրում են ունեցել: Թուրքիայի ակտիվ դիրքորոշումը կարևոր դեր է խաղացել կայունության ապահովման գործում։ Իր հերթին, մենք նույնպես պարբերաբար տեղեկացնում ենք թուրքական կողմին ձեռնարկված միջոցառումների մասին և համատեղ քայլեր ենք ձեռնարկում կայուն խաղաղության ուղղությամբ»,- հայտարարել է Ադրբեջանի ԱԳ նախարարը։
Թարգմանությունը՝ Էմմա Չոբանյանի
