Իմ և Աջապահյանի անձնական խոսակցությունը ձայնագրել, բերել, կցել են գործերին․ Գալստանյան․ ՏԵՍԱՆՅՈՒԹ

«Այնքան այս գործի տակ ոչ մի բան չկա, որ իմ և Միքայել սրբազանի անձնական խոսակցությունը, որ միգուցե նաև անձնական կյանքի խոստովանություն է եղել, ձայնագրվել և բերել, կցել են այս գործերին։ Սա է ձեր որակը, որովհետև ձեզ համար պաշտոն, փող պահելը ավելի թանկ է, քան պատիվը»,-դատական նիստում հայտարարեց Բագրատ արքեպիսկոպոս Գալստանյանը։

Նշենք, որ Երևանի քրեական դատարանում դատավոր Կարեն Ֆարխոյանի նախագահությամբ շարունակվում է «Սրբազան պայքար»-ի առաջնորդ Բագրատ արքեպիսկոպոս Գալստանյանի և 17 անձանց վերաբերյալ քրեական գործի քննությունը։

Գործով անցնող մեղադրյալների փաստաբաններն ի նշան դատավորի և դատական համակարգի դեմ բողոքի՝ բոյկոտել են այսօրվա դատական նիստը։

Ըստ մեղադրանքի՝ Բագրատ արքեպիսկոպոս Գալստանյանին (աշխարհիկ անունը՝ Վազգեն Գալստանյան) մեղադրանք է առաջադրվել այն բանի համար, որ «նա, իր կողմից նախաձեռնված և ղեկավարվող «Սրբազան պայքար» անվանումով շարժումն իրականացնելու մի քանի ամիսների ընթացքում չկարողանալով Հայաստանի Հանրապետության Սահմանադրությամբ թույլատրված եղանակներով իրագործել իր կողմից շարժման առջև դրված՝ Հայաստանի Հանրապետությունում իշխանությունը ստանձնելու նպատակը, 2024 թվականի նոյեմբեր ամսից սկսած նպատակադրվել է այն իրագործել ՀՀ Սահմանադրությամբ չթույլատրված եղանակով, և այդ նպատակի իրականացման համար շարժման մի շարք մասնակիցների՝ Մովսես Շարբաթյանի, Հայկ Շահնազարյանի, Տիգրան Թոփալյանի, Լիդյա Մանթաշյանի, Հրայր Հակոբյանի, Կարո Օկումուշյանի, Արթուր Սարգսյանի, Իգոր Սարգսյանի, Արա Ռոստոմյանի, Արսեն Ղազարյանի, Արման Իսրայելյանի, Աղվան Արշակյանի, Արմեն Ալեքսանյանի, Միհրան Մախսուդյանի, Դավիթ Գալստյանի և այլ անձանց հետ նախնական համաձայնությամբ խմբի կազմում, ձեռք են բերել ահաբեկչություն կատարելու և իշխանությունը զավթելու համար անհրաժեշտ միջոցներ և գործիքներ, ինչպես նաև դիտավորությամբ ստեղծել են այլ պայմաններ՝ այդ կերպ կատարելով իշխանությունը յուրացնելու նախապատրաստություն»:

Մանրամասները՝ տեսանյութում։

Մանյա Պողոսյան