31.07.2026 | 00:19
Կոնֆերենցիաների լիգա. «Ալաշկերտը» 10 ֆուտբոլիստով պարտվեց «Կլուժին»
Փաստաբանները բոյկոտեցին Բագրատ արքեպիսկոպոս Գալստանյանի և մյուսների գործով դատական նիստը․ ՏԵՍԱՆՅՈՒԹ
21.08.2025 | 15:36
Բագրատ արքեպիսկոպոս Գալստանյանի և գործով անցնող 17 անձանց փաստաբանները դատարանի բակում հայտարարեցին, որ այսօր չեն մասնակցելու դատական նիստին՝ այսպիսով իրենց բողոքն արտահայտելով ընդդեմ դատավորի և դատական համակարգի։
Փաստաբանական թիմի անդամ Վահան Հովհաննիսյանը նշեց, որ հետագայում ևս գործողությունների են դիմելու։
«Մենք միակարծիք ենք, որ այսօր դատարանի դահլիճում չի իրականացվելու արդարադատություն, ինչպես դա եղավ երեկ Լիդյա Մանթաշյանի խափանման միջոցը քննելու դեպքում։ Եթե մենք ասում ենք, որ արդարադատություն չի իրականացվում, գնանք լեգիտիմացնե՞նք դատարանի գործողությունները»,- հավելեց նա։
Նշենք, որ Երևանի քրեական դատարանում դատավոր Կարեն Ֆարխոյանի նախագահությամբ շարունակվում է «Սրբազան պայքար»-ի առաջնորդ Բագրատ արքեպիսկոպոս Գալստանյանի և 17 անձանց վերաբերյալ քրեական գործի քննությունը։
Ըստ մեղադրանքի՝ Բագրատ արքեպիսկոպոս Գալստանյանին (աշխարհիկ անունը՝ Վազգեն Գալստանյան) մեղադրանք է առաջադրվել այն բանի համար, որ «նա, իր կողմից նախաձեռնված և ղեկավարվող «Սրբազան պայքար» անվանումով շարժումն իրականացնելու մի քանի ամիսների ընթացքում չկարողանալով Հայաստանի Հանրապետության Սահմանադրությամբ թույլատրված եղանակներով իրագործել իր կողմից շարժման առջև դրված՝ Հայաստանի Հանրապետությունում իշխանությունը ստանձնելու նպատակը, 2024 թվականի նոյեմբեր ամսից սկսած նպատակադրվել է այն իրագործել ՀՀ Սահմանադրությամբ չթույլատրված եղանակով, և այդ նպատակի իրականացման համար շարժման մի շարք մասնակիցների՝ Մովսես Շարբաթյանի, Հայկ Շահնազարյանի, Տիգրան Թոփալյանի, Լիդյա Մանթաշյանի, Հրայր Հակոբյանի, Կարո Օկումուշյանի, Արթուր Սարգսյանի, Իգոր Սարգսյանի, Արա Ռոստոմյանի, Արսեն Ղազարյանի, Արման Իսրայելյանի, Աղվան Արշակյանի, Արմեն Ալեքսանյանի, Միհրան Մախսուդյանի, Դավիթ Գալստյանի և այլ անձանց հետ նախնական համաձայնությամբ խմբի կազմում, ձեռք են բերել ահաբեկչություն կատարելու և իշխանությունը զավթելու համար անհրաժեշտ միջոցներ և գործիքներ, ինչպես նաև դիտավորությամբ ստեղծել են այլ պայմաններ՝ այդ կերպ կատարելով իշխանությունը յուրացնելու նախապատրաստություն»:
Մանրամասները՝ տեսանյութում։
