ՀՀԿ-ն ոչ մեկի ամուսինը չէ, մենք լավ ընկեր ենք. Արմեն Աշոտյան. ՏԵՍԱՆՅՈՒԹ

ՀՀ-ում նոր քաղաքական ուժ ստեղծելու պարարտ հող կա։ Այս մասին մամուլի ասուլիսի ժամանակ հայտարարեց ՀՀԿ փոխնախագահ Արմեն Աշոտյանը։

Ըստ Աշոտյանի՝ ՀՀԿ-ն շահագրգռված է, որ ընդդիմադիր դաշտում նոր և ուժեղ միավոր ձևավորվի։

«Այսօրվա ընդդիմությունն այնքան ճկուն չէ, որ հավակնենք այդ դաշտը լցնել մեզանով։ Դա ակնհայտ է, քանի որ եղած քաղաքական ընդդիմադիր և իշխանական միավորները դարձել են չափից ավելի կոշտ, այդքան ճկուն չեն։ Ընդդիմության մասով եմ ասում, ցավոք, այդքան ճկուն չենք, որ հավակնենք այդ դաշտը լցնել մեզնով։ Ցանկացած նոր ընդդիմադիր ուժի ի հայտ գալու համար մնացած ընդդիմադիր ուժերը պետք է որ լինեն շահագրգռված»,- տեսակետ հայտնեց ընդդիմադիր գործիչը։

Ինչ վերաբերում է կալանավորված գործարար Սամվել Կարապետյանի կողմից ստեղծվելիք նոր քաղաքական ուժին,  նա  պատասխանեց, որ ՀՀԿ-ն  շահագրգռված է, որպեսզի գաղափարական իմաստով ինչքան հնարավոր է ուժեղ միավոր ձևավորվի։

«Սպասելիքները, որ ձևավորվում են այս հարցի կապակցությամբ, չպետք է ավելորդ շտապեցնեն Սամվել Կարապետյանի քաղաքական թիմին, որպեսզի նրանք կարողանան բավարարել ոչ թե առկա օրակարգի ակնկալիքները, այլ այն խնդիրների լուծմանը, որի համար ձևավորվում են»,- նկատեց նա։

Հարցին՝ ՀՀԿ-ն խորհրդարանական ընտրություններին  հնարավո՞ր է միանա Սամվել Կարապետյանի կողմից ստեղծվելիք ուժին,  Աշոտյանն արձագանքեց՝ «ՀՀԿ-ն ոչ մեկի ամուսինը չէ, որևէ մեկի հետ ամուսնացած չենք, որ ամուսնալուծվենք,  մենք լավ ընկեր ենք քաղաքական դաշտում»։

Մանրամասները՝ տեսանյութում։

Մանյա Պողոսյան