Ռումինիայում էներգետիկ ոլորտում արտակարգ դրություն է մտցվել Ադրբեջանից աղտոտված նավթի պատճառով

Ռումինիայի էներգետիկայի նախարարությունը արտակարգ դրություն է հայտարարել էներգետիկ ոլորտում՝ լցանավերով  Ադրբեջանից աղտոտված նավթի մատակարարումից հետո։

«OMV Petrom-ն ընդունել է ադրբեջանական հում նավթով (92 հազար տոննա) նավ, որը բեռնվել է Ջեյհանի (Թուրքիա) նավահանգստում: Այս խմբաքանակն աղտոտված է եղել բեռնման նավահանգստում առկա օրգանական քլորիդներով: Բացի այդ, վերլուծությունից հետո Petrom-ը որոշել է հրաժարվել 92 հազար տոննա մեկ այլ խմբաքանակից: Այսպիսով, ներմուծված 184 հազար տոննա հում նավթը դարձել է անհասանելի Petrobrazi-ի վերամշակման գործարանին մատակարարելու համար»,- հայտնել է Ռումինիայի էներգետիկայի նախարարությունը, փոխանցում են ադրբեջանական լրատվամիջոցները։

Պատճառը Բաքու-Թբիլիսի-Ջեյհան նավթամուղի օպերատոր BTC Pipeline Company-ի տերմինալի մի քանի պահուստարանների աղտոտումն է կոռոզիոն նյութով։

Այս կապակցությամբ ռումինական ընկերությունը դիմել է իշխանություններին՝ անհապաղ բացել ռազմավարական պետական պահուստը և հատկացնել 80 հազար տոննա նավթ և 30 հազար տոննա դիզելային վառելիք։ Սակայն պահուստը բացելու համար Ռումինիան պետք է հայտարարի արտակարգ դրություն, որի մասին տեղեկացրել է Եվրահանձնաժողովին։

Օրերս աղտոտված ադրբեջանական նավթ էր հայտնաբերվել նաև Չեխիայում և Ավստրիայում։

Ավելի վաղ էլ հաղորդվել էր, որ Բաքու-Թբիլիսի-Ջեյհան խողովակաշարով տեղափոխվող ադրբեջանական նավթի որակն ընկել է, ինչի հետևանքով Azeri Light տեսակի նավթի գինը նվազել է։ Մի քանի արդյունաբերական աղբյուրներ Reuters-ին հայտնել են, որ Բաքու-Թբիլիսի-Ջեյհան խողովակաշարով  տեղափոխվող ադրբեջանական հում նավթի որոշ բեռներում հայտնաբերվել է օրգանական քլորիդների բարձր մակարդակ, ինչը հանգեցրել է բեռնման խափանումների։

Թարգմանությունը՝ Էմմա Չոբանյանի