«Աերոֆլոտ»-ի տեղեկատվական համակարգերի խափանման պատճառը հաքերային հարձակումն է եղել

ՌԴ Գլխավոր դատախազությունը հաստատել է, որ «Աերոֆլոտ»-ի տեղեկատվական համակարգերի խափանման պատճառը հաքերային հարձակումն է եղել, գրում է The Insider-ը։

«Դատախազության ստուգման նյութերի հիման վրա հարուցվել է քրեական գործ՝ ՌԴ Քրեական օրենսգրքի 272-րդ հոդվածի 4-րդ մասի (համակարգչային տեղեկատվությանը անօրինական մուտք) հանցագործության հատկանիշներով»,- ասվում է գերատեսչության հայտարարության մեջ։

Դատախազության հանձնարարությամբ հետաքննություն է սկսվել «Շերեմետևո» օդանավակայանում չվերթների հետաձգման և չեղարկման վերաբերյալ, որը պայմանավորված էր «Աերոֆլոտ»-ի տեղեկատվական համակարգերի վրա հաքերային հարձակմամբ։

Հուլիսի 28-ի առավոտյան «Աերոֆլոտ»-ը հայտնել էր համակարգչային խափանման մասին, որը հանգեցրել է տասնյակ չվերթների չեղարկման:

Հաքերային հարձակման պատասխանատվությունը ստանձնել են «Silent Crow» և «Cyberpartisans BY» խմբերը՝ հաքերային հարձակումն անվանելով «ուղիղ հաղորդագրություն» ԱԴԾ-ի, Համակարգչային միջադեպերի ազգային համակարգող կենտրոնի և RT-Solar-ի (կիբերանվտանգության ոլորտում մասնագիտացած ընկերություն) համար։ «Աերոֆլոտ»-ը Solar-ի կայքում հաճախորդների ցանկում չէ։

Հունվարին Silent Crow-ն հայտարարել էր, որ կոտրել է Պետական գրանցման, կադաստրի և քարտեզագրության դաշնային ծառայության (Ռոսռեեստրի) տվյալների բազան և հրապարակայնորեն հասանելի է դարձրել որոշ տեղեկություններ, որոնք, ենթադրաբար, վերցված են անշարժ գույքի միասնական պետական գրանցամատյանից։

«Կիբերպարտիզաններն» էլ բելառուս հաքերների խումբ է, որը բազմիցս կոտրել է բելառուսական կառավարական մարմինների համակարգչային համակարգերը։ Հաքերները ներկայանում են որպես Ալեքսանդր Լուկաշենկոյի ռեժիմի դեմ պայքարողներ։

Թարգմանությունը՝ Էմմա Չոբանյանի