«Աերոֆլոտ»-ը 42 չվերթ է չեղարկել տեղեկատվական համակարգի աշխատանքում խափանման պատճառով

Ռուսական «Աերոֆլոտ»-ը հուլիսի 28-ի առավոտյան ավիաընկերությունը հայտնել է իր տեղեկատվական համակարգերի աշխատանքում խափանման մասին, փոխանցում  է Current time-ը:

«Հնարավոր են ծառայությունների ընդհատումներ։ Դրա հետ կապված՝ սպասվում է թռիչքների ժամանակացույցի հարկադիր փոփոխություն, այդ թվում՝ հետաձգման և չեղարկման միջոցով»,- ասվում է ավիաընկերության հայտարարության մեջ։

«Աերոֆլոտ»-ն ուղևորներին խնդրում է հետևել ավիաընկերության չվերթներին օդանավակայանների կայքերում և օդանավակայաններում հայտարարություններին: Ընկերությունը նշել է, որ «մասնագետների թիմն աշխատում է թռիչքային պլանի կատարման ռիսկերը նվազագույնի հասցնելու և ծառայությունների բնականոն գործունեությունն արագ վերականգնելու ուղղությամբ»:

Ավելի ուշ «Աերոֆլոտ»-ը հայտարարել է, որ տեղեկատվական համակարգերի խափանման պատճառով չեղարկել է Մոսկվայից 42 չվերթ։ Մոսկվայի «Շերեմետևո» օդանավակայանում երկար հերթեր են գոյացել։ Ընկերությունը խնդրել է չեղարկված չվերթների ուղևորներին գնալ «Շերեմետևո» օդանավակայանի ուղեբեռի ընդունման գոտի՝ գրանցված ուղեբեռը վերցնելու համար։

«Ուղևորների կուտակումից խուսափելու համար խնդրում ենք լքել «Շերեմետևո» օդանավակայանը»,- ասվում է հայտարարության մեջ։

«Աերոֆլոտ»-ը Ռուսաստանի ամենամեծ ավիացիոն խումբն է, որի մեջ են մտնում «Աերոֆլոտ», «Ռոսիա» և «Պոբեդա» ավիաընկերությունները: Կոմերսանտի տվյալներով՝ 2024 թվականին խմբի ավիաընկերությունները տեղափոխել են ավելի քան 55 միլիոն ուղևորի, իսկ ռուսական շուկայում նրանց բաժինը կազմել է 42.3%: «Աերոֆլոտ» և «Ռոսիա» ավիաընկերությունների երթուղային ցանցը ներառում է 248 կանոնավոր ուղղություն, իսկ «Պոբեդա» ցանցինը՝ 94:

Վերջին շաբաթների ընթացքում Ռուսաստանում չվերթները բազմիցս չեղարկվել և տեղափոխվել են ուկրաինական անօդաչու թռչող սարքերի հարձակումների պատճառով։ Անօդաչուների հարձակման սպառնալիքը հաճախ հանգեցրել է «Շերեմետևո» և Մոսկվայի մյուս օդանավակայանի գործունեության սահմանափակումների։

Թարգմանությունը՝ Էմմա Չոբանյանի