Ասում են` մտավորականներն ինչու են լուռ, ի՞նչ խոսենք ձեզ հետ, ինչո՞ւ եք իրար ուտում. Սամվել Սևադա. ՏԵՍԱՆՅՈՒԹ

«Հաճախ քայլում եմ Երևանով և չգիտեմ`որտեղ նստել, մեր հին տեղերը, սրճարանները չկան, կարծես օտար մարմին լինենք Երևանում, զբոսաշրջիկների մեջ: Երևանի կենտրոնը դարձել է ուրիշներինը, այլևս մերը չէ: Ես չեմ ճանաչում կենտրոնը, կարծես ուրիշ երկրում լինեմ: Առաջվա Երևանը չկա»,- Factor TV-ի հետ զրույցում նշում է գեղանկարիչ, լուսանկարիչ, բանաստեղծ Սամվել Սևադան:

Մեր զրուցակիցը, ով, ի դեպ, տարիներ առաջ եղել է Երևանի գլխավոր նկարիչը, նկատում է՝ Երևանը կորցրել է իր ինքնատիպությունը. «Երևանը վարդագույն քաղաք էր, հիմա տեսքը կորցրել է: Փոխվել է նաև մթնոլորտը: Այսքան մեքենա չպետք է բերեին-լցնեին քաղաք. այն հիվանդ է: Փողոցները ուռած երակների պես տանում են վարակը դեպի սիրտ. իմ տողերն են»:

Սամվել Սևադան խոսում է ոչ միայն Երևանում, այլև, առհասարակ, մեր երկրում ձևավորված մթնոլորտից: Ասում է`արվեստագետներն այսօր հաճախ լռում են, քանի որ իրենց էլ է հոգնեցրել ատելության մթնոլորտը. «Վա´յ իմ նման մարդկանց, որոնց նշանառության տակ է առնում թե´ իշխանությունը, թե´ ընդդիմությունը, եթե չես մասնակցում հայհոյախոսությանը, ուրեմն`կա´մ նիկոլական ես, կա´մ քոչարյանական: Հոգնել եմ այդ ամենից, միևնույն է`իմ ձայնը լսող չկա: Պետք է խելքի գանք, իրար ուտելով`տեղ չենք հասնի: Այսօր ամեն արժեցող-չարժեցող ասում է`մտավորականներն ինչ են մտածում, որ չեն խոսում: Ի՞նչ խոսենք ձեզ հետ, դուք խոսք հասկանու՞մ եք, որ խոսենք, ինչո՞ւ եք իրար ուտում»:

Նկարիչն անդրադառնում է նաև իշխանություն-եկեղեցի առճակատմանը. «Շատ մեծ վտանգներ եմ տեսնում, անհասկանալի վիճակ է այս պահին: Ինչ լուծում որ լինի, ի վնաս մեր ազգի չլինի…Աստված չանի`քաղաքացիական պատերազմ լինի, իսկապես, ժողովուրդը երկու մասի է բաժանված»:
Մանրամասները`տեսանյութում: