Սա իրավաբանություն չի, սա քաղաքական ուղղորդում է․ Միքայել արքեպիսկոպոս Աջապահյանի պաշտպան

Հայ առաքելական եկեղեցու Շիրակի թեմի առաջնորդ Միքայել արքեպիսկոպոս Աջապահյանի կալանքի դեմ պաշտպանների բողոքը մակագրվել է Վերաքննիչ քրեական դատարանի դատավոր Վաչե Մարգարյանին։ Մինչև բողոքի մակագրումը պաշտպան Երեմ Սարգսյանը Factor TV-ի հետ զրույցի ընթացքում կանխատեսել էր, որ Վերաքննիչ դատարանի 22 դատավորից հենց Վաչե Մարգարյանին է մակագրվելու բողոքի քննությունը։ Պաշտպանն այսօր մեր տաղավարում հիշեցրեց այս դրվագը, ակնարկելով, որ քաղաքական իշխանությունը միջամտում է արդարադատությանը։

Նշենք, որ ավելի վաղ՝ երբ Միքայել Աջապահյանին կալանավորելու միջնորդություն էր ներկայացվել առաջին ատյանի դատարան, պաշտպան Սարգսյանը կանխատեսել էր, որ Քննչական կոմիտե միջնորդությունը մակագրվելու է Երևանի քրեական դատարանի դատավոր Մասիս Մելքոնյանին։ Այդ ժամանակ կալանքի միջնորդությունը մակագրվել էր ձեռքով՝ դատարանի նախագահի կողմից․ այդ պայմաններում մարդկային գործոնի ազդեցությունը մակագրման գործընթացի վրա բացառել հնարավոր չէ։ Վերաքննիչ դատարանում, սակայն, բողոքները մակագրվում են համակարգչային եղանակով: Այդ դեպքում հարց է առաջանում, թե համակարգիչը 22 դատավորից ինչպես է ընտրել հենց Վաչե Մարգարյանին։

«Մենք ուշադիր հետևում ենք, թե տարբեր դատարաններում որ դատավորներն ինչ ունակություններ ունեն, ինչպիսի համարձակություն ունեն օբյեկտիվ որոշում կայացնելու, քաղաքական իշխանություններից ինչքան են վախենում, արդյոք ի վիճակի են ինքնուրույն լինել, անկախ լինել և, ընդհանրապես իրենց ինչ գործեր են մակագրվում։
Եթե իշխանությունները ցանկանում են անվրեպ իրականացնել կալանքի հաստատումը, բողոքի մերժումը, ուրեմն կոնկրետ դատավորների են մակագրվում։ Իմ փորձը, իմ դիտարկումները վկայում են այն մասին, որ վերաքննիչ դատարանում Արմեն Դանիելյանից հետո Վաչե Մարգարյանին են մակագրում նման գործերը»։

Երեմ Սարգսյանը նշեց, որ իրենք Միքայել արքեպիսկոպոս Աջապահյանին կալանավորելու դեմ Վերաքննիչ դատարան ներկայացված բողոքում նշել են, որ Մասիս Մելքոնյանն անաչառ դատավոր չէ։

«Մասիս Մելքոնյանին մենք բացարկ էինք հայտնել և պնդում էինք, որ դատավորը պատահական չի ընտրված, նրան հատուկ նշանակել են, որ կալանավորի։ Հիմա Վաչե Մարգարյանը, որին մենք ևս անվրեպ կանխատեսել ենք, պետք է քննարկի՝ արդյոք Մասիս Մելքոնյանը պատահական է ընտրվել, թե՞ նշանակել են՝ իր նման»,- ասաց Երեմ Սարգսյանը՝ եզրահանգելով․ ստացվում է՝ Վաչե Մարգարյանը կարծես իր վերաբերյալ որոշում է կայացնելու:

Երեմ Սարգսյանը նաև անդրադարձավ այն հարցին, թե ինչ նկատի ուներ Միքայել արքեպիսկոպոս Աջապահյանը՝ ասելով, որ Հայաստանում «ռազմական հեղաշրջում» պետք է կատարել, ինչպես նաև՝ թե  ինչ հանգամանքներում է սկսվել նրա նկատմամբ հետապդնումը։

«Սա իրավաբանություն չէ, քաղաքական ուղղորդում է»,- ասաց պաշտպանը։

Մանրամասները՝ տեսանյութում

Արաքս Մամուլյան