Թուրքիայի ընդդիմության առաջնորդի դեմ նոր հետաքննություն է սկսվել դատախազի դեմ արված մեկնաբանությունների պատճառով

Թուրքիայի դատախազությունը նոր հետաքննություն է սկսել երկրի գլխավոր ընդդիմադիր Ժողովրդահանրապետական կուսակցության (CHP) առաջնորդ Օզգյուր Օզելի նկատմամբ՝ իր կուսակցության դեմ շարունակվող հետապնդումներին ներգրավված դատախազի մասին նրա արած արտահայտությունների պատճառով։ Այս մասին հաղորդում է պետական TRT Haber հեռուստաալիքը, որին վկայակոչում է Turkish Minute-ը։

Օզելը մեղադրվում է «հանրային պաշտոնյային հրապարակավ վիրավորելու» և «սպառնալիքներ հնչեցնելու» մեջ՝ CHP-ի կողմից ղեկավարվող Ստամբուլի քաղաքապետարանի դեմ գործողությունների գործով դատախազ Ջահիտ Ջիհադ Սարըին քննադատելուց հետո: Օզելը մեկնաբանություններն արել է չորեքշաբթի Սիլիվրիում կայացած մամուլի ասուլիսում՝ CHP-ից Ստամբուլի քաղաքապետ Էքրեմ Իմամօղլուի՝ քաղաքական դրդապատճառներով գործով դատապարտվելուց հետո:

Իմամօղլուն, որը ներկայում բանտարկված է կոռուպցիայի մեղադրանքով, չորեքշաբթի դատապարտվել էր Գյուրլեքին վիրավորելու և սպառնալու համար, որը ղեկավարում է իր և իր կուսակցության դեմ ուղղված դատական հետապնդումը։ Նա դատապարտվել է 1 տարի 8 ամիս ազատազրկման՝ պետական պաշտոնյային վիրավորելու և երկու սպառնալիք հնչեցնելու համար, և եթե նրա դատավճիռը ուժի մեջ մնա, նրան սպառնում է քաղաքական գործունեություն ծավալելու արգելք։

Իր հայտարարության մեջ Օզելը Սարըին մեղադրել է ընթացիկ հետաքննությունների շրջանակում կալանավորված CHP պաշտոնյաներին և քաղաքական գործիչներին վախեցնելու և սպառնալու մեջ, և պնդել, որ նա ճնշում է գործադրել նրանց վրա՝ կեղծ ցուցմունքներ ստանալու համար։ Այնուհետև նա դատապարտել է CHP բանտարկված մյուս քաղաքական գործիչներին պատկանող մասնավոր բիզնեսների զավթումը և մեղադրել դատախազին անպատժելիության և դաժանության մեջ։

«Ինչո՞ւ եք հետապնդում 60-ամյա ընկերությունները, որոնք ստեղծվել են աշխատասեր ընտանիքների կողմից»,- հարցրել է Օզելը՝ կոչ անելով պատասխանատվության և դատապարտելով ենթադրյալ անարդարությունը։

Մարտին թուրքական դատարանը հրամայել էր բռնագրավել Իմամօղլուի ընտանիքին պատկանող շինարարական ընկերությունը, այն բանից հետո, երբ քաղաքապետը ձերբակալվել էր մարտի 19-ին։

Դատախազությունը հայտարարել է, որ առանձին հետաքննություն է սկսել Սարըին ուղղված սոցիալական ցանցերում Օզելի հայտարարություններից հետո արված գրառումների վերաբերյալ։

CHP-ն մոտ մեկ տարի է, ինչ ենթարկվում է խիստ հետապնդման, որի արդյունքում մինչ օրս ձերբակալվել են 17 քաղաքապետեր և տասնյակ կուսակցական պաշտոնյաներ։ Իմամօղլուի ձերբակալությունից հետո CHP-ի և նրա մունիցիպալիտետների վրա ճնշումը մեծացել է։

Քննադատները նշում են, որ լայնածավալ հետաքննությունները նպատակ ունեն թուլացնել ընդդիմությունը և ամրապնդել իշխանությունը հնարավոր արտահերթ ընտրություններից առաջ, ինչպես նաև կանխել Իմամօղլուի նախագահի պաշտոնում առաջադրվելը։

Հիշեցնենք, որ ավելի վաղ էլ Օզելին անձեռնմխելիությունից զրկելու միջնորդություն է ներկայացվել երկրի խորհրդարան։

Բացի այդ`հայտնի էր դարձել, որ Անկարայի գլխավոր դատախազը նոր հետաքննություն է սկսել ընդդիմության առաջնորդ Օզգյուր Օզելի դեմ՝ «նախագահին վիրավորելու» և այլ հանցագործությունների համար։

Թարգմանությունը՝ Էմմա Չոբանյանի