Արցախցիների հանրահավաքը հանուն իրենց իրավունքների պաշտպանության. ՈՒՂԻՂ

Ազատության հրապարակում մեկնարկել է արցախցիների հանրահավաքը՝ ի պաշտպանություն իրենց իրավունքների:

Ավելի վաղ արցախցիների իրավունքների պաշտպանության խորհուրդը հայտարարել էր, որ հուլիսի 12-ին Ազատության հրապարակում հանրահավաք կանցկացնեն` բարձրաձայնելով իրենց իրավունքների և սոցիալական խնդիրներին վերաբերող հարցեր:

«Մեր պահանջագրի 12 կետերն անփոփոխ են, հիմա ավելի քան հաստատակամ ենք ու վերջնական որոշել ենք, որ պայքարը շարունակվում է։ Եվ շարունակվելու է այնքան ժամանակ, մինչև գոնե մինիմում մեր պահանջները չկատարվեն»,- նշված է հաղորդագրության մեջ:

Արցախցիների իրավունքների պաշտպանության խորհրդից նաև հայտնում են, որ հանրահավաքն արտոնվել է, սակայն ոստիկանությունը և Երևանի քաղաքապետարանը մերժել են նախատեսված երթի և նստացույցի հայտերը։ «Երթը նախատեսված էր դեպի ՀՀ կառավարության ու Ազգային ժողովի շենքեր։ Այնուամենայնիվ, հանրահավաքի ընթացքում մենք պատրաստվում ենք կիրառել բոլոր օրինական միջոցները` ոստիկանության հետ համագործակցությամբ մեր խաղաղ երթն իրականացնելու և իրավունքների պաշտպանության համար»,- հայտարարում են խորհրդից:

Հիշեցնենք, որ բռնի տեղահանված արցախցիները հունիս ամսվա համար այլևս չեն ստանա 40-հազարական դրամ աջակցությունը. կառավարության որոշմամբ՝ աջակցության ծրագրերը կուղղվեն միայն սոցիալապես խոցելի խմբերին՝ հաշմանդամություն ունեցողներին, անչափահասներին, ծերերին։

Ավելի վաղ, կառավարությունն արցախցիներին առաջարկել էր Ազատության հրապարակից հանել վրանները՝ խոստանալով ևս երկու ամսով՝ ապրիլ և մայիս ամիսների համար երկարաձգել աջակցության ծրագիրը: Հունիսի 1-ից մեկնարկել է սոցաջակցության նոր կարգը, այդ ծրագիրն, ըստ արցախցիների, բազմաթիվ խնդիրներ ունի, շատերը չեն կարողանում այն լրացնել։

Արցախցիները շարունակում են պնդել, որ աջակցությունները պետք է շարունակվեն՝ մինչև յուրաքանչյուր ընտանիք ապահովվի սեփական բնակարանով:

Մանրամասները՝ տեսանյութում

Մանյա Պողոսյան