12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
Ալիևը կրկին խոսել է «արևմտյան ադրբեջանցիներից» և հայտարարել , թե ՀՀ-ն Ադրբեջանին «150 մլրդ դոլարի վնաս է հասցրել»
Քաղաքականություն
04.07.2025 | 15:23
Ադրբեջանի նախագահ Իլհամ Ալիևը գրավյալ հայաթափված Ստեփանակերտում ընթացող Տնտեսական համագործակցության կազմակերպության (ՏՀԿ) 17-րդ գագաթնաժողովում ունեցած ելույթում կրկին արդարացրել է Արցախի դեմ իրականացրած ռազմական ագրեսիան ու էթնիկ զտումը։
«Մենք բազմիցս հայտարարել ենք Հայաստանին և նրա հետևում կանգնած պետություններին, որ եթե Հայաստանը կամավոր չլքի մեր օկուպացված տարածքները, մենք կվերականգնենք մեր երկրի տարածքային ամբողջականությունը ռազմական միջոցներով։ Ցավոք, Հայաստանը և նրա հովանավորները լուրջ չընդունեցին մեր նախազգուշացումը և, որպես արդյունք, զղջացին դրա համար»,- հայտարարել է Ալիևը։
Նա շարունակել է ՀՀ-ին տարածքային պահանջներ ներկայացնել՝ խոսելով «արևմտյան ադրբեջանցիների» կեղծ նարատիվից։ Հիշեցնենք, որ պաշտոնական Բաքուն «Արևմտյան Ադրբեջան» է համարում Հայաստանի տարածքը։
«Մեծ նշանակություն ունի նաև Հայաստանից արտաքսված «արևմտյան ադրբեջանցիների» իրավունքների ապահովումը։ Մենք բարձր ենք գնահատում անցյալ ամիս Ստամբուլում կայացած Իսլամական համագործակցության կազմակերպության նախարարների խորհրդում բոլոր 57 անդամ պետությունների կողմից բանաձևի ընդունումը, որով աջակցություն է հայտնվում Հայաստանից բռնի կերպով արտաքսված ադրբեջանցիների վերադարձի իրավունքին»,- հայտարարել է Ադրբեջանի նախագահը։
Նա, միաժամանակ, ասել է, թե Հայաստանը, իբր, Ադրբջանին 150 մլրդ դոլարի վնաս է հասցրել։
«Տարածքների օկուպացիայի ընթացքում Հայաստանն Ադրբեջանին հասցրել է 150 միլիարդ դոլարի վնաս։ Օկուպացիայի տարիներին Հայաստանը ոչնչացրել է մեր քաղաքներն ու գյուղերը, մշակութային և կրոնական հուշարձանները։ 67 մզկիթներից 65-ը ոչնչացվել են Հայաստանի կողմից»,- ասել է Ալիևը։
Հիշեցնենք, որ ՀՀ ԱԳՆ-ն ավելի վաղ հայտարարություն էր տարածել Իսլամական համագործակցության կազմակերպության նախարարական վերջին համաժողովի շրջանակում ընդունված «Ստամբուլի հռչակագրում» և Ադրբեջանի նախաձեռնությամբ ներկայացված բանաձևերում տեղ գտած խեղաթյուրված և ծայրահեղ միակողմանի ձևակերպումների առնչությամբ։ ԱԳՆ-ն հայտարարել էր, որ Հայաստանի Հանրապետության տարածքում չկա և չի կարող լինել, այսպես կոչված, «Արևմտյան Ադրբեջան»։
Թարգմանությունը՝ Էմմա Չոբանյանի
