ՌԴ-ում սահմանափակել են ադրբեջանական իշխանամերձ լրատվական կայքերի հասանելիությունը

Մոսկվայում և Ռուսաստանի այլ քաղաքներում ադրբեջանական լրատվական գործակալությունների կայքեր մուտք գործելու հետ կապված խնդիրներ են առաջացել։ Ադրբեջանական լրատվամիջոցների հաղորդմամբ՝ նման խնդիրներ կան Մոսկվայում, Աստրախանում, Վոլգոգրադում, Սանկտ Պետերբուրգում, Վոլոգդայում, Չելյաբինսկում և այլ շրջաններում։

Մասնավորապես, WiFi-ի և բջջային ինտերնետի միջոցով հասանելիություն չկա Global Media Group-ի կայքերին՝ Report.az, Oxu.az, Caliber.az: Խնդիրներ կան նաև այլ լրատվական պորտալների հասանելիության հետ կապված:

Report.az-ը նշում է, որ ՌԴ Կապի, տեղեկատվական տեխնոլոգիաների և զանգվածային լրատվության միջոցների վերահսկողության դաշնային ծառայությունը (Ռոսկոմնադզոր) «Report»-ին որևէ նախազգուշացում չի ուղարկել Ռուսաստանում գործակալության լրատվության սահմանափակման վերաբերյալ։ Այսպիսով, ռուսական կողմն առանց նախազգուշացման սահմանափակել է կայքի մուտքը։

Հավելեք, որ «Global Media Group»-ը կառավարամետ մեդիա հոլդինգ է, որը գործում է 2017 թվականից և վերահսկվում է Ադրբեջանի կառավարության կողմից։ Ընկերությունների խումբը ներառում է հեռուստաալիքներ, լրատվական գործակալություններ, թերթեր և այլ ընկերություններ, որոնք գործում են Ադրբեջանում և արտերկրում։

Տարբեր տեղեկությունների համաձայն՝ Global Media Group-ի մաս կազմող լրատվական կայքերը ֆինանսավորվում են Ադրբեջանի պետական ​​նավթային ընկերության՝ SOCAR-ի կողմից։ Դրանք պետական ​​քարոզչություն իրականացնող լրատվամիջոցներ են։

Հիշեցնենք, որ Ադրբեջանի և Ռուսաստանի հարաբերությունները վերջին օրերին սրվել են՝ այն բանից հետո, երբ հունիսի 27-ին Եկատերինբուրգում ձերբակալվել էին ադրբեջանական ծագում ունեցող ավելի քան 50 անձինք։ Ձերբակալության ընթացքում մահացել է առնվազն երկու մարդ՝ Ադրբեջանի 60-ամյա քաղաքացի Հուսեյն Սաֆարովը և նրա եղբայրը՝ 55-ամյա Զիյադդինը։ Եվս երեք մարդ տեղափոխվել է վերակենդանացման բաժանմունք։

Բաքուն պահանջում է պատասխանատվության ենթարկել մեղավորներին, իսկ Ադրբեջանի արտաքին գործերի նախարարությունը «խիստ բողոք» է հայտնել Ռուսաստանի դեսպանին։ Ադրբեջանի գլխավոր դատախազությունը քրեական գործ է հարուցել Ռուսաստանի անվտանգության ուժերի կողմից ադրբեջանցիների խոշտանգումների և սպանության փաստով։

Թարգմանությունը՝ Էմմա Չոբանյանի