12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
ՌԴ-ն բոլոր միջոցներով կպաշտպանի իր քաղաքացիներին․Պեսկովը՝ Բաքվում ձերբակալված ՌԴ քաղաքացիներին ծեծի ենթարկելու մասին
Քաղաքականություն
02.07.2025 | 15:10
Մոսկվան կպաշտպանի Ադրբեջանում ձերբակալված իր քաղաքացիների օրինական շահերը դիվանագիտական ճանապարհներով՝ օգտագործելով դրա համար հասանելի բոլոր միջոցները։ Այս մասին լրագրողներին հայտարարել է ՌԴ նախագահի մամուլի քարտուղար Դմիտրի Պեսկովը, գրում է ՏԱՍՍ-ը։
«Մենք ուշադիր դիտել ենք տեսանյութը և ուշադրություն դարձրել բոլոր մանրամասներին։ Մենք կպաշտպանենք մեր քաղաքացիների օրինական շահերը դիվանագիտական ուղիներով և կօգտագործենք դրա համար մեր տրամադրության տակ եղած բոլոր միջոցները»,- ասել է Պեսկովը՝ պատասխանելով Ադրբեջանում ձերբակալված չորս ռուսների լուսանկարի վերաբերյալ հարցին, որտեղ երևում են կապտուկներ և վնասվածքներ։
Նա նաև նշել է, որ Ռուսաստանի քննչական կոմիտեի ղեկավար Ալեքսանդր Բաստրիկինը ներկայումս մշտական կապի մեջ է Ադրբեջանի գլխավոր դատախազ Քամրան Ալիևի հետ, և նրանք քննարկում են խնդրահարույց թվացող հարցերը։
«Ներկայումս Քննչական կոմիտեի նախագահ Բաստրիկինը մշտական կապի մեջ է Ադրբեջանի գլխավոր դատախազի հետ, և հենց այդ շփումների ընթացքում են նրանք զբաղվում այն հարցերով, որոնք խնդրահարույց են թվում», – լրագրողներին ասել է Պեսկովը։
Հիշեցնենք, որ Ադրբեջանի Ներքին գործերի նախարարությունը Բաքվում իրականացված օպերատիվ-հետախուզական միջոցառումների ընթացքում ձերբակալել էր կազմակերպված հանցավոր երկու խմբի անդամների՝ ՌԴ քաղաքացիների, որոնք կասկածվում են Իրանից թմրանյութերի տարանցման, դրանց առցանց ապօրինի շրջանառության և կիբերհանցագործության մեջ:
Նախօրեին էլ Բաքվի դատարանը 8 ձերբակալվածի նկատմամբ խափանման միջոց էր ընտրվել 4 ամիս ժամկետով կալանքը։
Ադրբեջանական լրատվամիջոցների կողմից հրապարակված կադրերում դատարան բերված ռուսների դեմքերին նկատելի էին դաժան ծեծի հետքեր, կապտուկներ։
Բացի այդ՝ Բաքվի դատարանը «Sputnik Ադրբեջան» լրատվական գործակալության տնօրեն Իգոր Կարտավիխին և աշխատակից Եվգենի Բելոուսովին ևս 4 ամսով կալանավորելու որոշում է կայացրել։
Թարգմանությունը՝ Էմմա Չոբանյանի
