Հայոց եկեղեցին թաթախված է լրջագույն խնդիրների մեջ, բայց դրա թուլացումը ձեռնտու է Թուրքիային և Ադրբեջանին․ Արա Պապյան․ ՏԵՍԱՆՅՈՒԹ

ԱՄՆ-ն Իրանի միջուկային օբյեկտները ռմբակոծելուց հետո չի դարձել պատերազմի կողմ։ Factor TV-ի հետ հարցազրույցում նման տեսակետ է հայտնում քաղաքագետ Արա Պապյանը։

«Դասական առումով պատերազմը ցամաքային ուժերի բախումն է, սակայն Իրանի ատոմային ծրագիրն այլևս գոյություն չունի։ Սա նշանակում է, որ Թեհրանի ատոմային հավակնությունները մի քանի տարով հետ են մղվել»,- նշում է Արա Պապյանը։

Մերձավոր Արևելքում ստեղծված իրավիճակը, ըստ քաղաքագետի, կարող է բացասական ազդեցություն ունենալ Հայաստանի տնտեսության վրա, եթե փակվի հայ-իրանական կենսական նշանակության սահմանը։ Արա Պապյանը նման սցենարի դեպքում ՀՀ իշխանությունների կողմից քայլերի հերթականության պլան չի տեսնում։ «Չեմ լսել ԱԽ նիստի մասին, չեմ լսել որևէ քննարկման մասին։ Սա կարող է ծանր հետևանքներ ունենալ, հատկապես՝ դեպի Պարսից ծոցի երկրներ, քանի որ այդ ճանապարհը մեզ համար շատ կարևոր է։ Չինաստանից ապրանքների մի մասը գալիս է Իրանի տարածքով։ Հաշվի առնելով, որ Ռուսաստանի ճանապարհը Վրաստանի միջոցով ևս խնդիրներ ունի, անպայման պետք է այդ հարցով զբաղվել։ Սա մեզ համար անվտանգային խնդիր է»,- ասում է Արա Պապյանը՝ ընդգծելով, որ ստեղծված իրավիճակը ՀՀ ղեկավարությունը պետք է քննարկի այլ երկրների առաջնորդների հետ։

«Միակ հանդիպումը, որ տեսանք, Փաշինյան-Էրդողան հանդիպումն էր։ Հիմա ի՞նչ պետք է անի Փաշինյանը՝ թող Մակրոնի, Պուտինի հետ խոսի, օրինակ։ Այս զորավարժությունները, որ իրականացնում են Ադրբեջանն ու Թուրքիան՝ արդյոք ՌԴ-ն ու ՀԱՊԿ-ը, որոնք իբր մեր դաշնակիցներն են, պատրաստվում են կատարե՞լ իրենց պարտականությունները, թե՞ ոչ։ Թող խոսեն, թող ասեն՝ ո՛չ»,- ասել է նա։

Արա Պապյանն անդրադարձել է նաև եկեղեցի-պետություն տարաձայնություններին և նշել, որ Հայ Առաքելական եկեղեցին բարեփոխման կարիք ունի, բայց, ըստ նրա, ոչ այս փուլում։

Մանրամասները՝ տեսանյութում։

Նարեկ Կիրակոսյան