Հաղորդաշարեր
13.10.2018 | 18:06«Ամեն կուսակցություն պետք է միշտ պատրաստ լինի ընտրությունների, իսկ եթե դրանց հատուկ ժամանակ է պետք պատրաստվելու համար, նշանակում է՝ ֆորմայի մեջ չեն: Պատրաստ լինել ընտրություններին՝ նշանակում է մշտական կապի մեջ լինել հասարակության հետ: Եթե այդ կապը պահպանվում է, այլ ոչ թե հաստատվում է ընտրությունից ընտրություն, դրանց համար պետք է նշանակություն չունենա՝ ընտրությունները կանցկացվեն մեկ շաբաթ, մեկ ամիս, թե մեկ տարի հետո»,-Factor.am-ի հետ զրույցում նման տեսակետ է հայտնում Երևանի պետական տիկնիկային թատրոնի գեղարվեստական ղեկավար Ռուբեն Բաբայանը՝ անդրադառնալով քաղաքական որոշ գործիչների և քաղաքագետների այն պնդումներին, թե ոչ բոլոր ուժերն են պատրաստ դեկտեմբերին մասնակցելու խորհրդարանական ընտրություններին:
Նա խոսում է նաև քաղաքական դաշտում ընդդիմություն ձևավորելու նախապայմանների մասին՝ նկատելով, որ ուժեղ ընդդիմությունը ուժեղացնում է հենց իշխանությանը. «Չի կարելի կտրել ընդդիմության թթվածինը և հետո ասել, թե ինչ արած, ընդդիմություն չունենք: Իշխանության գլխում երկար մնալու համար պետք է ունենալ ոչ քո կողմից ձևավորված ընդդիմություն: Իսկ դրա համար անհրաժեշտ է ունենալ քաղաքացիական հասարակությաւն: Մենք հիմա հրճվում ենք ժողովրդի մեծամասնությամբ, բայց դրանով պետություն չեն ստեղծում, այլ քաղաքացիական հասարակություն ձևավորելով»:
Պարոն Բաբայանի խոսքով՝ եթե վարչապետը մտածում է իր հայացքներն առաջ տանելու մասին, պետք է ընդդիմության հետ համապատասխան դաշտ ստեղծի, իսկ եթե անապատ դարձնի այդ դաշտը, միայն ինքը երևա, որևէ գաղափար չի կարող իրականացվել: «Հնարավոր չէ իրականացնել պայծառ գաղափարներ՝ ոչ պայծառ մեթոդներով: Փաշինյանը պետք է գնա բանական էգոիզմի ճանապարհով»,- ասում է նա: Թատրոնի գեղարվեստական ղեկավարը կարծիք է հայտնում քաղաքականության մեջ անկեղծության գործոնի վերաբերյալ՝ շեշտելով, որ հաջողության հասնելու համար դրան պետք է գան լրացնելու մի շարք այլ գործոններ ևս:
«Անկեղծությունը բավարար է սիրո մեջ, բայց քաղաքականության մեջ այն կարող է նմանվել հիմարության, եթե մի շարք կարևոր էլեմենտներ բացակայեն, առաջին հերթին՝ պրոֆեսիոնալիզմը»,- նկատում է մեր զրուցակիցը:
Մանրամասները՝ տեսանյութում:
Աննա Բաբաջանյան
