Հյուսիս-հարավի շինաշխատանքներում այս պահին որևէ խոչընդոտ չկա․ ՏԿԵՆ

Այս պահի դրությամբ Հյուսիս-հարավ ճանապարհի շինարարական աշխատանքներն ընթանում են բնական հունով, որևէ խոչընդոտ չկա։ Այս մասին Factor.am-ի հետ զրույցում տեղեկացրեց Տարածքային կառավարման և ենթակառուցվածքների նախարարի մամուլի խոսնակ Սոնա Հարությունյանը՝ անդրադառնալով Իրան-Իսրայել հակամարտության պատճառով Հյուսիս-հարավ ճանապարհի շինարարության ընթացքի հնարավոր խնդիրներին վերաբերող հարցին։

Արդյոք տարածաշրջանում ստեղծված իրավիճակի պայմաններում տարածքային կառավարման նախարարությունը որևէ ռիսկ տեսնում է շինարարության հետագա ընթացքի վերաբերյալ՝ Հարությունյանը նշեց, որ ռիսկ չեն տեսնում։

«Այս պահին Իրան-Իսրայել հակամարտությունը ոչ մի ազդեցութուն չի ունեցել Հյուսիս- հարավի շինարարության ընթացքի վրա։ Աշխատանքները ինչ տեմպերով ընթանում էին, նույն ձևով շարունակվում են»,- հավելեց ՏԿԵ նախարարի մամուլի խոսնակը։

Նշենք, որ Հյուսիս-Հարավի Քաջարան-Ագարակ հատվածի շինարարությունը համատեղ իրականացնում են հայ և իրանցի շինարարները։ Քաջարան-Ագարակ ճանապարհահատվածի, ինչպես նաև Քաջարան-Ագարակ թունելի կառուցման կապալառուն իրանական «Abad Rahan Pars International Group and Tunnel Sadd Ariana» կոնսորցիումն է, իսկ որակի հսկողությունն իրականացնում է խորվաթական ընկերությունը։

Հավելենք, որ Հյուսիս-հարավ ծրագրի ընդհանուր արժեքը կազմում է 214,4 միլիոն դոլար, Քաջարան-Ագարակ հատվածի նոր երթուղու ընդհանուր երկարությունը մոտ 32 կիլոմետր է։ Շինարարական աշխատանքները նախատեսված է ավարտել 2027 թվականին: Ծրագիրը ներառում է 5 նոր տրանսպորտային հանգույցների, 6 նոր վերգետնյա անցումների, մոտ 920 մետր ընդհանուր երկարությամբ 2 նոր թունելների և 17 նոր կամուրջների կառուցում։

Հիշեցնենք, որ Իսրայելը հունիսի 13-ին հարձակում է սկսել Իրանի վրա՝ թիրախավորելով միջուկային օբյեկտները, ռազմական և էներգետիկ ենթակառուցվածքները: Հարվածների հետևանքով զոհվել են բարձրաստիճան զինվորականներ, միջուկային ոլորտի գիտնականներ և խաղաղ բնակիչներ։ Իրանն էլ ի պատասխան հարվածներ է հասցնում Իսրայելի տարածքին:

Մանյա Պողոսյան