04.04.2026 | 20:03
ՃՏՊ՝ հրդեհի բռնկմամբ
Իսրայելը հայտարարել է Իրանի ռազմաօդային ուժերի հրամանատարին ու ղեկավարության մեծ մասին չեզոքացնելու մասին
Քաղաքականություն
13.06.2025 | 18:39
Իսրայելի պաշտպանության նախարարությունը հայտարարել է, որ Իրանի տարածքում իրականացված օդային հարվածները «չեզոքացրել» են Իսլամական հեղափոխության պահապանների կորպուսի (ԻՀՊԿ) ռազմաօդային ուժերի բարձրաստիճան ղեկավարության մեծ մասին, գրում է France 24-ը։
«Պաշտպանության նախարարին տեղեկացվել է, որ ԻՀՊԿ ռազմաօդային ուժերի ղեկավարության մեծ մասը չեզոքացվել է ստորգետնյա շտաբում կայացած հանդիպման ժամանակ»,- ասվում է նախարարության հայտարարության մեջ։
The Times of Israel-ի հաղորդմամբ՝ Իսրայելի զինվորականների տվյալներով՝ հարվածի հետևանքով զոհվել է ԻՀՊԿ ռազմաօդային ուժերի հրամանատար, բրիգադի գեներալ Ամիր Ալի Հաջիզադեն։ Նրա հետ միասին սպանվել են նաև ԻՀՊԿ ավիատիեզերական ուժերի բարձրաստիճան պաշտոնյաները՝ ստորգետնյա հրամանատարական կենտրոնում հանդիպման ժամանակ։ Հրամանատարական կենտրոնին հարված է հասցվել կործանիչներով։
Իսրայելական կողմը նշում է, թե ԻՀՊԿ-ի ռազմաօդային ուժերը պատասխանատու են անցյալ տարվա ապրիլին և հոկտեմբերին Իսրայելի վրա Իրանի բալիստիկ հրթիռներով և անօդաչու թռչող սարքերով հարձակումների համար, և որ պաշտոնյաները ղեկավարել են նաև 2019 թվականին Սաուդյան Արաբիայի նավթային օբյեկտների վրա անօդաչու թռչող սարքերով հարձակումը։
«Հաջիզադեն վերջին տարիներին բազմիցս հրապարակավ հավատարմության երդում է տվել է Իսրայելը ոչնչացնելու գաղափարին և կենտրոնական դեր է խաղացել Իսրայելը ոչնչացնելու ծրագրի մշակման գործում»,- ասվում է իսրայելական կողմի հայտարարության մեջ։
Reuters-ն էլ նշում է, որ Իսրայելի հարվածի հետևանքով զոհվել է 20 իրանցի բարձրաստիճան հրամանատար։
Ավելի վաղ Իրանը հաստատել էր, որ Իսրայելի հարվածների հետևանքով զոհվել է Իրանի ԶՈՒ երեք բարձրաստիճան հրամանատար, 6 միջուկային գիտնական։ Բարձրաստիճան զինվորականների փոխարեն արդեն նշանակումներ են արվել։
Թարգմանությունը՝ Էմմա Չոբանյանի
