Քաղաքականություն
11.06.2025 | 10:07
Լոս Անջելեսի (Կալիֆորնիա) քաղաքապետ Քարեն Բասը պարետային ժամ է հայտարարել՝ շարունակվող բողոքի ցույցերի և անկարգությունների պատճառով, գրում է BBC-ն։
«Ես պարետային ժամ եմ սահմանում Լոս Անջելեսի կենտրոնում՝ վանդալիզմն ու թալանը կանխելու համար։ Եթե դուք չեք ապրում կամ աշխատում Լոս Անջելեսի կենտրոնում, խնդրում ենք խուսափել այդ տարածք այցելելուց։ Իրավապահ մարմինները կձերբակալեն պարետային ժամը խախտողներին։ Մենք նախատեսում ենք պարետային ժամը (ժամը 20:00-ից մինչև ժամը 06:00-ը) ուժի մեջ պահել մի քանի օր»,- ասել է նա։
Հիշեցնենք, որ հունիսի 6-ին Լոս Անջելեսում անօրինական ներգաղթյալների զանգվածային ձերբակալություններ սկսվեցին, իսկ արդեն հունիսի 7-ի երեկոյան 44 մարդ էր կալանավորվել ներգաղթի օրենքները խախտելու մեղադրանքով։ Իրավապահ մարմինների գործողություններին ի պատասխան՝ քաղաքում ցույցեր սկսվեցին, որոնք վերաճեցին անկարգությունների: Ցուցարարները ճանապարհ էին փակել, քարեր ու ճայթռուկներ նետել ԱՄՆ ներգաղթի և մաքսային ծառայության աշխատակիցների ուղղությամբ:
Ավելի վաղ տեղեկացրել էինք, որ Թրամփի միգրացիոն քաղաքականության դեմ բողոքի ցույցերն ընդլայնվել են, Միացյալ Նահանգների այլ քաղաքներ ևս միացել են Լոս Անջելեսում մեկնարկած ցույցերին։
Կալիֆորնիայի նահանգապետ Գևին Նյուսոմը հայտարարել է, որ Կալիֆորնիա նահանգը դատի կտա ԱՄՆ նախագահ Դոնալդ Թրամփին՝ Լոս Անջելեսում բողոքի ցույցերը ճնշելու համար Ազգային գվարդիա տեղակայելու պատճառով։
Թարգմանությունը՝ Անահիտ Խաչատրյանի
