12.01.2026 | 23:30
Գերմանիան և Հնդկաստանն ընդլայնում են ռազմական համագործակցությունը
ՊԵԿ նախագահն ասաց՝ «լավ նորություններ կան»․ 24 ժամ անց հայկական բեռնատարների՝ հայ-վրացական սահմանի հատումը սահմանափակվեց
Քաղաքականություն
10.06.2025 | 23:28
Լավ նորություններ կան, արդեն բեռները տեղաշարժվում են Ռուսաստան։ Վրաստանի մեր գործընկերները փորձաքննություն են իրականացնում և դրանց արդյունքներով հասկանում են՝ ինչ անեն, բայց լավ նորությունն այն է, որ արդեն հոսք կա, երեկ խորհրդարանում պատասխանելով Factor TV-ի հարցին՝ ասել էր ՊԵԿ նախագահ Էդուարդ Հակոբյանը՝ անդրադառնալով Վրաստանի տարածքով հայկական կոնյակի՝ ՌԴ արտահանման խնդիրներին։
Ուշագրավ է, որ Էդուարդ Հակոբյանի հայտարարությունից 24 ժամ անց նրա իսկ ղեկավարած ՊԵԿ-ը հայտարարում է, որ հայկական բեռնատարների համար փակել է հայ-վրացական սահմանային անցակետը։
«Հաշվի առնելով վրացական մաքսային մարմիններում վերջին օրերի կուտակումները՝ ՀՀ մաքսային ծառայությունը նպատակահարմար չի համարել հայկական բեռնատարների՝ հայ-վրացական սահմանի հատումը։
Հօգուտ տնտեսվարողի նախաձեռնված միջոցառումը ժամանակավոր է՝ մինչև կկարգավորվի վրացական կողմի թողունակության հարցը։
Պետական եկամուտների կոմիտեն գործում է բացառապես ստեղծված իրավիճակում սահմանը հատելու ցանկություն ունեցող բեռնափոխադրողների շահերից՝ վստահեցնելով, որ սահմանի վրացական հատվածում կուտակումների շուտափույթ կարգավորման պարագայում կկազմակերպվի հայկական մեքենաների պատշաճ բացթողումն անցակետից»,- ասվում է ՊԵԿ-ի հայտարարությունում։
Հիշեցնենք՝ արդեն ավելի քան մեկ ամիս է, ինչ հայկական կոնյակ ու գինի արտահանողները դժգոհում են Վրաստանի տարածքում իրականացվող «անհարկի ստուգումներից ու խոչընդոտներից», ինչի հետևանքով դեպի Ռուսաստան և այլ երկրներ ուղևորվող բեռնատարները շաբաթներով մնում են վրացական մաքսակետերում։
Հունիսի 6-ին այս թեմայով Երևանում պետք է քննարկում տեղի ունենար Վրաստանի գյուղատնտեսության նախարարի և ՀՀ էկոնոմիկայի նախարարի միջև, սակայն վրաց պաշտոնյան չեղարկել է այցը Երևան՝ ծանրաբեռնվածության հիմնավորմամբ։
Նարեկ Կիրակոսյան
